സംസ്ഥാനത്ത് സ്വർണവിലയിൽ മാറ്റമില്ലാതെ തുടരുന്നു. ഇന്ന് പവന് 74,320 രൂപയിലും ഗ്രാമിന് 9,290 രൂപയിലുമാണ് വ്യാപാരം നടക്കുന്നത്. ഇന്നലെ പവന് 40 രൂപയും ഗ്രാമിന് അഞ്ച് രൂപയും കുറഞ്ഞ് ഈ നിരക്കിലെത്തിയിരുന്നു. തുടർച്ചയായി രണ്ട് ദിവസത്തെ വിലക്കുറവ് സാധാരണക്കാരന് ആശ്വാസം നൽകുന്നുണ്ട്. ഓഗസ്റ്റ് 12-ന് പവന് 640 രൂപയും ഗ്രാമിന് 80 രൂപയും കുറഞ്ഞ് 75,000 രൂപയിൽ നിന്ന് 74,360 രൂപയിലേക്കാണ് വില താഴ്ന്നത്.ചിങ്ങമാസം അടുത്തുവരുന്നതിനാൽ വിപണിയിൽ വിലയിൽ മാറ്റങ്ങൾ ഉണ്ടാകാൻ സാധ്യതയുണ്ടെന്ന് സാമ്പത്തിക വിദഗ്ധർ പറയുന്നു. ഇടയ്ക്കിടെ ഉയരുകയും താഴുകയും ചെയ്യുന്ന നിരക്കുകൾ ആഭരണ വിപണിയെ അനിശ്ചിതത്വത്തിലാക്കി. ഡോളറിന്റെ മൂല്യത്തിലെ മാറ്റങ്ങൾക്കും ഈ ചാഞ്ചാട്ടത്തിൽ വലിയ പങ്കുണ്ട്.റഷ്യ-യുക്രൈൻ സംഘർഷം അവസാനിപ്പിക്കുന്നതിനെ കുറിച്ച് യുഎസ് പ്രസിഡന്റ് ഡൊണാൾഡ് ട്രംപ്, റഷ്യൻ പ്രസിഡന്റ് വ്‌ളാദിമിർ പുടിൻ എന്നിവരുമായി അലാസ്‌കയിൽ ചർച്ച നടത്താൻ തീരുമാനിച്ചതാണ് ഇപ്പോഴത്തെ വിലക്കുറവിന്റെ പ്രധാന കാരണം. ട്രംപിന്റെ നിർദ്ദേശപ്രകാരം പുടിൻ സംഘർഷം അവസാനിപ്പിക്കാൻ സമ്മതിച്ചാൽ വില ഇനിയും കുറയാൻ സാധ്യതയുണ്ടെന്നാണ് വിലയിരുത്തൽ.സ്വർണവിലയെ ബാധിക്കുന്ന മറ്റ് പ്രധാന ഘടകങ്ങളിൽ അമേരിക്കൻ പണപ്പെരുപ്പം, പലിശനിരക്കുകളിൽ വരുന്ന മാറ്റങ്ങൾ, രാജ്യാന്തര രാഷ്ട്രീയ സംഘർഷങ്ങൾ, വൻകിട രാജ്യങ്ങളുടെ സാമ്പത്തിക നയങ്ങൾ, ഓഹരി വിപണിയിലെ ഉയർച്ച-താഴ്ചകൾ എന്നിവയും ഉൾപ്പെടുന്നു. വിവാഹ സീസണിൽ ആഭരണങ്ങൾക്ക് ഉയർന്ന ആവശ്യകതയുള്ളതിനാൽ ചിങ്ങമാസത്തിലെ വിപണി വിലയെ ആളുകൾ അടുത്തുനോക്കുകയാണ്. വിലക്കുറവ് നടക്കുന്ന സമയത്ത് മുൻകൂർ ബുക്ക് ചെയ്യുന്നതിലൂടെ വരാനിരിക്കുന്ന വർദ്ധനവ് നിയന്ത്രിക്കാമെന്നാണ് വ്യാപാരികളുടെ നിർദേശം.