ജിഎസ്ടി ഘടനയില്‍ വമ്ബൻ പൊളിച്ചെഴുത്തിനൊരുങ്ങി കേന്ദ്രം; വില കുറയുന്ന സാധനങ്ങള്‍ ഇവ

സ്വാതന്ത്ര്യദിന സന്ദേശത്തിൽ രാജ്യത്തെ പൊതുജനത്തെ ഉദ്ദേശിച്ച് പ്രധാനമന്ത്രി നരേന്ദ്ര മോദി വലിയൊരു പ്രഖ്യാപനം നടത്തി. ജിഎസ്ടി സംവിധാനത്തിൽ വലിയ പരിഷ്‌കരണം ഉടൻ നടപ്പിലാക്കുമെന്നും, ദീപാവലിക്ക് ജനങ്ങൾക്ക് നൽകുന്ന ‘സമ്മാനം’ ആകുമെന്നും അദ്ദേഹം വ്യക്തമാക്കി. പുതിയ മാറ്റങ്ങൾ വഴി സാധാരണക്കാരുടെ നികുതിഭാരം കുറയുകയും, ജീവിതച്ചെലവിൽ ആശ്വാസം ലഭിക്കുകയും ചെയ്യും എന്നതാണ് പ്രധാന പ്രതീക്ഷ.ഇപ്പോൾ നിലവിലുള്ള 5%, 12%, 18%, 28% എന്നിങ്ങനെ നാലു സ്ലാബുകളാണ് രാജ്യത്ത് നടപ്പിലാക്കുന്നത്. എന്നാൽ കേന്ദ്രം ഇത് രണ്ടായി ചുരുക്കുകയാണ് ലക്ഷ്യമിടുന്നത്. 5% , 18% എന്നിങ്ങനെ മാത്രം സ്ലാബുകൾ തുടരുന്ന സാഹചര്യം വരാനിടയുണ്ട്. 12% വിഭാഗത്തിലുള്ള ഭൂരിഭാഗം ഉൽപ്പന്നങ്ങളും 5% നിരക്കിലേക്ക് മാറും. 28% വിഭാഗത്തിലെ ഉൽപ്പന്നങ്ങളുടെ ഭൂരിപക്ഷവും 18% സ്ലാബിലേക്കായിരിക്കും പോകുക. ഇതോടെ മരുന്നുകൾ, മെഡിക്കൽ ഉപകരണങ്ങൾ, ഇൻഷുറൻസ് സേവനങ്ങൾ, കാർഷികോപകരണങ്ങൾ, ഗൃഹോപകരണങ്ങൾ, സ്റ്റേഷനറി സാമഗ്രികൾ തുടങ്ങി പല മേഖലകളിലും വിലക്കുറവ് പ്രതീക്ഷിക്കാം.അതേസമയം, പുകയില, സിഗരറ്റ്, കോള അടങ്ങിയ എയറേറ്റഡ് പാനീയങ്ങൾ, പാൻ മസാല എന്നിവയ്ക്കുള്ള നികുതി 40% ആയി ഉയർത്താനാണ് നീക്കം. ഓൺലൈൻ ഗെയിമിംഗിനും 40% നികുതി ബാധകമാക്കും. സ്വർണ്ണം, വെള്ളി, ഡയമണ്ട് പോലുള്ള ഉൽപ്പന്നങ്ങൾക്ക് നിലവിലുള്ള പ്രത്യേക നിരക്ക് തുടരുമെന്ന സൂചനയും ലഭ്യമാണ്. പെട്രോളിയം ഉൽപ്പന്നങ്ങളും മദ്യവും സംസ്ഥാനങ്ങളുടെ നികുതി നിയന്ത്രണത്തിൽ തന്നെയായിരിക്കും.പുതിയ മാറ്റങ്ങളോടെ വില കുറഞ്ഞേക്കാവുന്നവയിൽ ലൈഫ് ഇൻഷുറൻസ്, ഹെൽത്ത് ഇൻഷുറൻസ് പ്രീമിയങ്ങൾ, മരുന്നുകൾ, ഗ്ലൂക്കോമീറ്റർ, പ്രീപാക്ക് ചെയ്ത തേങ്ങാവെള്ളം, ഫലം-പച്ചക്കറി ജ്യൂസ്, ടെലിവിഷൻ, ഫ്രിഡ്ജ്, വാഷിങ് മെഷീൻ, എസി, കീടനാശിനികൾ, നോട്ട്ബുക്കുകൾ, പേന, ജ്യാമിതി ബോക്സ്, കരകൗശല വസ്തുക്കൾ, കാർഷികോപകരണങ്ങൾ, കോൺടാക്ട് ലെൻസ്, സിമന്റ്, ടെക്സ്റ്റൈൽസ്, വളങ്ങൾ, നവീകരണ എനർജി ഉപകരണങ്ങൾ തുടങ്ങിയവ ഉൾപ്പെടുന്നു.കേന്ദ്രം വിലയിരുത്തുന്നത്, ഇത്തരം പരിഷ്‌കരണം ഉപഭോഗം വർദ്ധിപ്പിക്കുകയും, സമ്പദ്‌വ്യവസ്ഥയുടെ വളർച്ചയ്ക്ക് ഉത്തേജനം നൽകുകയും ചെയ്യും എന്നതാണ്. എന്നാൽ, ഇതിന്റെ യഥാർത്ഥ പ്രയോജനം ജനങ്ങൾക്ക് ലഭിക്കുമോ എന്നതിൽ സംശയങ്ങൾ തുടരുന്നു. മുൻകാല ജിഎസ്ടി ഇളവുകൾ ജനങ്ങൾക്ക് കാര്യമായ ആശ്വാസം നൽകാത്തതായിരുന്നുവെന്ന കാര്യവും ധനമന്ത്രി കെ. എൻ. ബാലഗോപാൽ ചൂണ്ടിക്കാട്ടി.2017 ജൂലൈ ഒന്നിന് ഇന്ത്യയിൽ ജിഎസ്ടി പ്രാബല്യത്തിൽ വന്നിരുന്നു. അതിന് ശേഷം എട്ട് വർഷങ്ങൾക്കു ശേഷമാണ് ഇത്ര വലിയൊരു പൊളിച്ചെഴുത്ത് നടപ്പിലാക്കാൻ കേന്ദ്രം തയ്യാറെടുക്കുന്നത്. വിലക്കയറ്റം ജനങ്ങളുടെ ജീവിതത്തെ ബാധിച്ചിരിക്കുന്ന ഈ സമയത്ത്, പുതിയ മാറ്റം യഥാർത്ഥത്തിൽ ആശ്വാസം നൽകുമോയെന്നത് രാജ്യത്തെ ഉറ്റുനോക്കിക്കൊണ്ടിരിക്കുകയാണ്.