വയനാട് ഗവ. മെഡിക്കൽ കോളജിന്‌ ഇപ്പോഴും ദേശീയ മെഡിക്കൽ കമ്മിഷൻ (എൻ.എം.സി.) അംഗീകാരം ലഭിച്ചിട്ടില്ലെങ്കിലും, ഇവിടെ ഇരുപത്തിയഞ്ചോളം അധ്യാപകർ സേവനം അനുഷ്ഠിക്കുന്നു. എന്നാൽ വിദ്യാർത്ഥികളില്ലാത്തതിനാൽ ഇവർ ജോലി ഇല്ലാതെ ക്വാർട്ടേഴ്സിൽ കഴിയുകയാണ്.ആലപ്പുഴയും കോഴിക്കോട് ഗവ. മെഡിക്കൽ കോളജുകളിലുമുള്ള അധ്യാപകരെയാണ് മൂന്നു മാസം മുമ്പ് വയനാട്ടിലേക്ക് മാറ്റിയത്. ഇതിന്റെ ആഘാതം ഇരുവിടത്തുമുള്ള മെഡിക്കൽ വിദ്യാർത്ഥികൾക്കാണ് ബാധിച്ചത്. പരീക്ഷ അടുത്തിരിക്കെ സിലബസ് പൂർത്തിയാക്കാൻ സാധിക്കാത്ത സ്ഥിതിയിലാണ് അവർ. അധ്യാപകർ ഓൺലൈൻ ക്ലാസുകൾ വഴി വിദ്യാർത്ഥികളെ സഹായിക്കാൻ ശ്രമിക്കുന്നുണ്ടെങ്കിലും പഠന നിലവാരത്തിൽ ഗുരുതരമായ പ്രശ്നങ്ങളാണ് ഉയർന്നിരിക്കുന്നത്.മെഡിക്കൽ വിദ്യാഭ്യാസ വകുപ്പ് അധികൃതർ നൽകിയ നിർദേശപ്രകാരം, ദേശീയ മെഡിക്കൽ കമ്മിഷന്റെ അപ്രതീക്ഷിത പരിശോധന ഏതുസമയവും ഉണ്ടാകാവുന്നതുകൊണ്ട്, അധ്യാപകർ വയനാട്ടിൽ കുറച്ചു കൂടി ദിവസങ്ങൾ തുടരുമെന്നാണ് തീരുമാനം. പരിശോധനകൾക്കുശേഷം ഇവരെ തിരിച്ചയയ്ക്കുമെന്നാണ് സൂചന.മാനന്തവാടിയിലെ ജില്ലാ ആശുപത്രിയെ 2021-ൽ മെഡിക്കൽ കോളജായി ഉയർത്തിയെങ്കിലും നാലുവർഷം പിന്നിട്ടിട്ടും അംഗീകാരം ലഭിച്ചിട്ടില്ല. “മെഡിക്കൽ കോളജ്” എന്ന പേരിൽ പ്രവർത്തിക്കുന്നതിനാൽ പ്രതിദിനം 1800-2000 വരെ രോഗികൾ എത്തുന്നു. എന്നാൽ ഇവിടെ നിലവിലുള്ള ഏക സൂപ്പർ സ്പെഷാലിറ്റി സേവനം ഹൃദ്രോഗ വിഭാഗത്തിലാണ്, അതും ആഴ്ചയിൽ വെറും രണ്ട് ദിവസങ്ങൾ മാത്രമായി.