നടിയെ പീഡിപ്പിച്ച കേസിൽ നടൻ ഇടവേള ബാബുവിനെ പൊലീസ് അറസ്റ്റ് ചെയ്തു. മൂന്ന് മണിക്കൂറിലേറെ നീണ്ട ചോദ്യം ചെയ്യലിനുശേഷമാണ് പ്രത്യേക അന്വേഷണ സംഘം അറസ്റ്റ് രേഖപ്പെടുത്തിയതെന്ന് സൂചന. മുൻകൂർ ജാമ്യം ലഭിച്ചതിനാൽ അടുത്തുതന്നെ ജാമ്യത്തിൽ വിട്ടയക്കുമെന്ന് റിപ്പോർട്ടുകൾ പറയുന്നു.
അമ്മ സംഘടനയിൽ അംഗത്വം വാഗ്ദാനം ചെയ്ത് ഫ്‌ലാറ്റിലേക്ക് വിളിച്ചുവരുത്തിയ ശേഷം മോശമായി പെരുമാറിയെന്നും, ലൈംഗിക പരാമർശങ്ങളുമായി പെരുമാറിയെന്നും രണ്ട് പരാതികൾ നടനെതിരെ ഉയര്‍ന്നിരുന്നു. എറണാകുളം നോര്‍ത്ത് സ്റ്റേഷനും കോഴിക്കോട് നടക്കാവ് സ്റ്റേഷനും കേസുകള്‍ രജിസ്റ്റര്‍ ചെയ്തിട്ടുണ്ട്.
ഇതിനുശേഷം, സര്‍ക്കാര്‍ രൂപീകരിച്ച പ്രത്യേക അന്വേഷണ സംഘം ഹേമ കമ്മിറ്റിയുടെ റിപ്പോര്‍ട്ട് അടിസ്ഥാനമാക്കി ഇടവേള ബാബുവിനെ ചോദ്യം ചെയ്തു. അന്വേഷണ സംഘം ഫ്‌ലാറ്റിൽ നടത്തിയ പരിശോധനയിൽ ചില രേഖകൾ പിടിച്ചെടുത്തുവെന്ന് വിവരമുണ്ട്. കൂടാതെ, പരാതിക്കാരിയെ ഫ്‌ലാറ്റിലെത്തിച്ച് തെളിവെടുപ്പും നടത്തിയിരുന്നു.
മുകേഷിനെതിരായ ലൈംഗിക പീഡനപരാതിയിലും അടുത്തിടെ പ്രത്യേക അന്വേഷണ സംഘം നടപടി എടുത്ത് ജാമ്യത്തിൽ വിട്ടയച്ചിരുന്നു. ഹേമ കമ്മിറ്റി റിപ്പോര്‍ട്ടിലെ കൂടുതല്‍ വ്യക്തികളെ ചോദ്യം ചെയ്യാന്‍ അന്വേഷണ സംഘത്തിന്‍റെ നടപടി വിപുലമാക്കുകയാണ്.