ധനമന്ത്രി നിർമല സീതാരാമൻ ഈ വർഷത്തെ കേന്ദ്രബജറ്റിൽ നികുതി ഇളവുകളും വിപുലമായ പരിഷ്കാരങ്ങളും പ്രഖ്യാപിക്കാനൊരുങ്ങുന്നു. പ്രതിവർഷം 14 ലക്ഷം രൂപ വരെയുള്ള വരുമാനമുള്ളവർക്ക് നികുതി ആശ്വാസങ്ങൾ നൽകാനുള്ള പദ്ധതികൾ ആലോചിക്കുന്നു. കൂടാതെ, നികുതി ഫയലിംഗ് പ്രക്രിയ ലളിതമാക്കുന്നതും ശ്രദ്ധേയമാകും.
വയനാട്ടിലെ വാർത്തകൾ തൽസമയം അറിയാൻ വാട്സ്ആപ്പ് ഗ്രൂപ്പിൽ ജോയിൻ ചെയ്യുകhttps://chat.whatsapp.com/He6GJaaXJApLFGlSb9knVc
ഫെബ്രുവരി ഒന്നിന് രാവിലെ 11 മണിക്ക് ലോക്സഭയിൽ അവതരിപ്പിക്കപ്പെടുന്ന ബജറ്റ്, ധനമന്ത്രിയുടെ തുടർച്ചയായ എട്ടാമത്തെ ബജറ്റാണ്. ശനിയാഴ്ച പാർലമെന്റ് പ്രത്യേക സിറ്റിംഗ് സംഘടിപ്പിച്ച് ബജറ്റ് അവതരിപ്പിക്കുന്നതും ഇത്തവണത്തെ പ്രത്യേകതയാണ്.
നികുതിഘടനയിൽ പ്രതീക്ഷിക്കപ്പെടുന്ന മാറ്റങ്ങൾ
- ആദായനികുതി ഇളവ്: അടിസ്ഥാന നികുതിരഹിത പരിധി നിലവിലെ 3 ലക്ഷം രൂപയിൽ നിന്ന് 4 ലക്ഷം രൂപയാക്കി ഉയർത്തിയേക്കും.
- വരുമാന നിരക്കുകൾ: 3 ലക്ഷം മുതൽ 6 ലക്ഷം രൂപ വരെയുള്ള വരുമാനത്തിന് 5% നികുതി നിലവിൽ പ്രാബല്യത്തിലുണ്ടെങ്കിലും ഇതിൽ മാറ്റങ്ങൾ വരുത്തി, 14 ലക്ഷം രൂപ വരെയുള്ളവർക്ക് കൂടുതൽ ആനുകൂല്യങ്ങൾ നൽകാൻ സാധ്യതയുണ്ട്.
സാമ്പത്തിക മുന്നേറ്റങ്ങൾ
കഴിഞ്ഞ ഏപ്രിൽ മുതൽ നവംബർ വരെ രാജ്യത്തെ വ്യക്തിഗത ആദായനികുതി പിരിവ് 25% വർധിച്ച് 7.41 ലക്ഷം കോടിയായത് സർക്കാർ പ്രതീക്ഷകളെ ഉയർത്തിയിരിക്കുന്നു. ഈ സാഹചര്യത്തിൽ നികുതി ഘടനയെ ലളിതമാക്കാൻ നടപടി സ്വീകരിക്കുന്നത് കേന്ദ്രസർക്കാരിന്റെ മുൻഗണനയായിരിക്കുമെന്നാണ് അറിയുന്നത്.
തെരഞ്ഞെടുപ്പ് ലക്ഷ്യം
വോട്ടെടുപ്പ് നടക്കുന്ന ഡൽഹിയും ബിഹാറും മുൻനിർത്തി ചില പൊതുപ്രഖ്യാപനങ്ങളും ഇളവുകളും ബജറ്റിൽ ഉൾപ്പെടുത്താൻ സാധ്യതയുണ്ടെന്ന് സാമ്പത്തിക വിദഗ്ധർ വിലയിരുത്തുന്നു.
ഉപഭോക്താക്കൾക്ക് ആശ്വാസം
14 ലക്ഷം രൂപ വരെയുള്ള വരുമാനമുള്ളവരുടെ നികുതി ബാധ്യത കുറയ്ക്കുന്നതിലൂടെ ചെലവ് ലഘൂകരിക്കുകയാണ് ലക്ഷ്യം. അതേസമയം, മറ്റ് നികുതി നിരക്കുകളിലും നയങ്ങളിലുമുള്ള മാറ്റങ്ങൾ കുറവായിരിക്കും.