തിരുവനന്തപുരം: സംസ്ഥാന ആരോഗ്യ വകുപ്പ് രണ്ട് വർഷം കൊണ്ട് വീടുകളിൽ നടത്തിയ സർവേയിലൂടെ 9 ലക്ഷം പേർക്ക് കാൻസർ സാധ്യതയുണ്ടെന്ന് കണ്ടെത്തിയെങ്കിലും പരിശോധനയ്ക്ക് തയ്യാറായത് ആവലാതി കുറവാണെന്ന് ആരോഗ്യമന്ത്രി വീണാ ജോർജ്. ഇതുവരെ വെറും ഒന്നര ലക്ഷം പേരാണ് ആരോഗ്യ കേന്ദ്രങ്ങളിൽ എത്തി പരിശോധന നടത്തിയതെന്നും അവരെ വിദഗ്ധപരിശോധനകൾക്ക് വിധേയരാക്കുന്നതിനായി സർക്കാരിന്റെ നേതൃത്വത്തിൽ വിപുലമായ ജനകീയ പ്രചരണം നടത്തുമെന്നും മന്ത്രി വ്യക്തമാക്കി.
വയനാട്ടിലെ വാർത്തകൾ തൽസമയം അറിയാൻ വാട്സ്ആപ്പ് ഗ്രൂപ്പിൽ ജോയിൻ ചെയ്യുകhttps://chat.whatsapp.com/He6GJaaXJApLFGlSb9knVc
സ്തനാർബുദം അടക്കമുള്ള രോഗങ്ങൾ തുടക്കത്തിൽ തന്നെ കണ്ടെത്തി ചികിത്സിക്കുക എന്നത് അത്യന്താപേക്ഷിതമാണെന്ന് മന്ത്രി വ്യക്തമാക്കി. എഴുത്തുകാരിയും പൊതുപ്രവർത്തകയുമായ നിഷാ ജോസ് കെ. മാണി രാജ്യത്തുടനീളം നടത്തുന്ന കാരുണ്യ സന്ദേശ യാത്രയുടെ ഫ്ലാഗ് ഓഫ് വഴുതയ്ക്കാട് ഗവ. വിമൻസ് കോളജിൽ നിർവഹിച്ച് സംസാരിക്കുകയായിരുന്നു മന്ത്രി.
ദേശീയതലത്തിൽ സ്തനാർബുദം 11.5 ശതമാനമാണെങ്കിൽ കേരളത്തിൽ ഇത് 13.5 ശതമാനമാണെന്ന് ആരോഗ്യവകുപ്പ് കണക്കുകൾ സൂചിപ്പിക്കുന്നു. സാധാരണ രോഗലക്ഷണങ്ങൾക്ക് പോലും ഉടൻ ചികിത്സ തേടുന്ന മലയാളികൾ, കാൻസറെന്ന സംശയം തോന്നുമ്പോൾ പേടിയാൽ ഡോക്ടറെ കാണാൻ മടിക്കുകയാണ്. ഇത് മാറ്റേണ്ടതുണ്ടെന്നും രോഗനിർണയം വേഗത്തിൽ നടത്തേണ്ടതിന്റെ പ്രാധാന്യം പൊതുജനങ്ങളിലെത്തിക്കേണ്ടതുണ്ടെന്നും മന്ത്രി കൂട്ടിച്ചേർത്തു.
ലോകാരോഗ്യ സംഘടന 30 വയസിന് മുകളിലുള്ളവർക്ക് സ്തനാർബുദ സ്ക്രീനിങ് നിർബന്ധമാക്കിയിട്ടുണ്ടെങ്കിലും കേരളത്തിൽ അതിന്റെ പ്രചാരണം തീരെയില്ലെന്നത് ശ്രദ്ധേയമാണ്. ഇന്ത്യയിൽ ഓരോ രണ്ട് സ്തനാർബുദ രോഗികളിൽ ഒരാൾ മരണത്തിന് കീഴടങ്ങുന്നു. എന്നാൽ, പ്രാഥമികഘട്ടത്തിൽ തന്നെ രോഗം കണ്ടെത്താനായാൽ രോഗമുക്തി ഉറപ്പാക്കാമെന്ന് വിദഗ്ധർ പറയുന്നു. ആയതിനാൽ ജീവിതത്തിന്റെ ഗുണമേന്മയും ആരോഗ്യവും സംരക്ഷിക്കണമെങ്കിൽ കാലതാമസം കൂടാതെ പരിശോധനയ്ക്ക് തയ്യാറാകണമെന്ന് ആരോഗ്യവകുപ്പ് മുന്നറിയിപ്പ് നൽകുന്നു.