അമ്പലവയൽ ∙ ജലസേചന വകുപ്പിന്റെ പുതിയ നിർദ്ദേശങ്ങൾ പ്രകാരം ഡാമുകളുടെ ജലാശയത്തിന് സമീപം നിർമാണ പ്രവർത്തനങ്ങൾക്കുള്ള നിയന്ത്രണങ്ങൾ കടുപ്പിച്ചു. കാര്യപരിപാടികളുടെ ഭാഗമായുള്ള പുതിയ മാനദണ്ഡങ്ങൾ പ്രകാരം, പരമാവധി ജലനിരപ്പിൽ നിന്ന് 20 മീറ്ററും 100 മീറ്ററും മാറിനിൽക്കുന്ന രണ്ട് ബഫർ സോണുകൾ നിർവചിച്ചിട്ടുണ്ട്.
വയനാട്ടിലെ വാർത്തകൾ തൽസമയം അറിയാൻ വാട്സ്ആപ്പ് ഗ്രൂപ്പിൽ ജോയിൻ ചെയ്യുകhttps://chat.whatsapp.com/He6GJaaXJApLFGlSb9knVc
20 മീറ്റർ ബഫർ സോണിൽ നിർമാണ പ്രവർത്തനങ്ങൾ പൂർണമായും വിലക്കിയിട്ടുണ്ട്. ഡാമിന്റെ പരമാവധി ജലനിരപ്പിൽ നിന്ന് 20 മീറ്റർ അകലെ ഒരു നിർമാണ പ്രവർത്തനവും അനുവദിക്കില്ല. പരിസ്ഥിതി സംരക്ഷണത്തിനും ഡാമിന്റെ സുരക്ഷയ്ക്കുമായി ഈ മേഖല നിരോധിതമേഖലയായി പ്രഖ്യാപിച്ചു.
100 മീറ്റർ ബഫർ സോണിൽ നിയന്ത്രണങ്ങളോടെ നിർമാണ പ്രവർത്തനങ്ങൾ അനുവദിക്കും. 20 മീറ്റർ അതിരി കഴിഞ്ഞ് 100 മീറ്റർ ദൂരത്തിനുള്ളിൽ, ഡാമിന്റെ സുരക്ഷയെ ബാധിക്കാത്ത തരത്തിലുള്ള വീടുകൾ, റിസോർട്ടുകൾ, ഹോട്ടലുകൾ, വാസസ്ഥലങ്ങൾ എന്നിവയ്ക്കു മാത്രമാണ് അനുമതി. ഇതിനു മുമ്പായി ഡാമിന്റെ ചുമതലയുള്ള അധികാരിയുടെ എൻഒസി (NOC) നിർബന്ധമായും വേണം. നിർമിക്കുന്ന കെട്ടിടങ്ങളുടെ ഉയരം 10 മീറ്ററിനകം ആയിരിക്കണം. കച്ചവട സ്ഥാപനങ്ങൾ, വിദ്യാഭ്യാസ സ്ഥാപനങ്ങൾ, വ്യവസായശാലകൾ, ആശുപത്രികൾ എന്നിവ നിർമിക്കാൻ അനുവദിക്കില്ല. 100 മീറ്റർ പരിധിയിൽ മാലിന്യങ്ങൾ നിക്ഷേപിക്കാനോ ഖനന പ്രവൃത്തികൾ നടത്താനോ അനുമതിയില്ല.
ഇതുവരെ ഡാമുകളുടെ ജലാശയങ്ങൾക്ക് സമീപമുള്ള നിർമാണ പ്രവർത്തനങ്ങൾക്ക് അനുമതി നൽകുന്ന സമിതിയെ പിരിച്ചുവിട്ടതോടെയാണ് പുതിയ നിയന്ത്രണങ്ങൾ പ്രഖ്യാപിച്ചത്. ഈ സമിതിയിൽ ജലവിഭവ വകുപ്പ്, കെഎസ്ഇബി, വനം വകുപ്പ്, മലിനീകരണ നിയന്ത്രണ ബോർഡ്, സെന്റർ ഫോർ എർത്ത് സയൻസ് സ്റ്റഡീസ് എന്നിവയിലെ പ്രതിനിധികൾ ഉൾപ്പെട്ടിരുന്നു.
ഡാമിന്റെ ജലാശയങ്ങൾ പഞ്ചായത്തുകളുടെ പരിധിയിലാണെങ്കിൽ, പഞ്ചായത്ത് കെട്ടിട നിർമാണ ചട്ടങ്ങൾ പാലിക്കേണ്ടതുണ്ടെന്നുമാണ് നിർദ്ദേശം.
നിലവിൽ വയനാട്ടിലെ കാരാപ്പുഴ ഡാമിന്റെ ജലാശയത്തിന് സമീപം അനുമതിയില്ലാത്ത നിരവധി നിർമാണങ്ങൾ നടക്കുന്നു. പുതിയ നിയന്ത്രണങ്ങൾ പ്രഖ്യാപിച്ചിട്ടും അതിനെതിരെ അധികൃതർ ശക്തമായ നടപടികൾ സ്വീകരിച്ചിട്ടില്ലെന്നതാണ് പ്രധാന വിമർശനം.