സംസ്ഥാനത്തെ വിദ്യാഭ്യാസ സ്ഥാപനങ്ങളിൽ റാഗിങ് നിയന്ത്രിക്കാൻ കൂടുതൽ കർശന നടപടികൾ നടപ്പാക്കാനൊരുങ്ങുന്നു. ഇതിന്റെ ഭാഗമായി, ഓരോ സ്കൂളിലും റാഗിങ് വിരുദ്ധ സെല്ലുകൾ രൂപീകരിക്കുന്ന കാര്യം പൊതുവിദ്യാഭ്യാസ വകുപ്പ് പരിഗണനയിലാണെന്ന് വിദ്യാഭ്യാസ മന്ത്രി വി. ശിവൻകുട്ടി അറിയിച്ചു.
വയനാട്ടിലെ വാർത്തകൾ തൽസമയം അറിയാൻ വാട്സ്ആപ്പ് ഗ്രൂപ്പിൽ ജോയിൻ ചെയ്യുകhttps://chat.whatsapp.com/He6GJaaXJApLFGlSb9knVc
കുറച്ച് വിദ്യാഭ്യാസ സ്ഥാപനങ്ങളിൽ പോലും സമൂഹ നന്മയ്ക്ക് നിരക്കാത്ത സംഭവങ്ങൾ റിപ്പോർട്ട് ചെയ്യപ്പെടുന്നുണ്ട്. ഇത് തടയുന്നതിനൊപ്പം ബോധവൽക്കരണ പ്രവർത്തനങ്ങളും അടിസ്ഥാനതല ഇടപെടലുകളും ശക്തിപ്പെടുത്തേണ്ടതുണ്ടെന്നും മന്ത്രി വ്യക്തമാക്കി. നിലവിൽ സ്കൂളുകളിൽ അച്ചടക്ക സമിതികളും സ്കൂൾ കൗൺസലിങ് സംവിധാനവും സ്കൂൾ പ്രൊട്ടക്ഷൻ ഗ്രൂപ്പുകളും പ്രവർത്തിച്ചുവരുന്നു. എന്നിരുന്നാലും, റാഗിങ് പോലുള്ള സംഭവങ്ങൾ പൂര്‍ണമായി തടയാനായിട്ടില്ല. അതിനാൽ, സ്കൂളുകളിൽ മാത്രമല്ല, ഉന്നത ക്ലാസുകളിലും കോളേജുകളിലും വിദ്യാർത്ഥികൾ സ്വീകരിക്കേണ്ട നിലപാടുകൾ ചെറുപ്പത്തിലേ അവരിലൂന്നിക്കാനുള്ള ശ്രമമാണ് റാഗിങ് വിരുദ്ധ സെല്ലുകൾ വഴി ലക്ഷ്യമിടുന്നതെന്നും അദ്ദേഹം പറഞ്ഞു.
റാഗിങ് വിരുദ്ധ സെല്ലുകളുടെ ഘടനയും പ്രവർത്തന രീതികളും നിശ്ചയിക്കാൻ വിദ്യാഭ്യാസ വകുപ്പിലെ ഉന്നത ഉദ്യോഗസ്ഥർ അടങ്ങുന്ന ഒരു സമിതിയെ നിയോഗിക്കാനാണ് തീരുമാനം. സ്കൂൾ അധ്യാപകർ വിദ്യാർത്ഥികളുമായി കൂടുതൽ അടുപ്പം പുലർത്തുന്നതിനും അവർ അനുഭവിക്കുന്ന പ്രശ്‌നങ്ങൾ തുറന്നുപറയാനുള്ള സൗകര്യം ഒരുക്കുന്നതിനും പ്രത്യേക നടപടികൾ സ്വീകരിക്കുമെന്ന് വിദ്യാഭ്യാസ മന്ത്രി കൂട്ടിച്ചേർത്തു.
അതേസമയം, സംസ്ഥാന സ്കൂളുകളിൽ ഈ വർഷം മുതൽ എട്ടാം ക്ലാസിൽ സബ്ജക്‌റ്റ് മിനിമം മാർക്ക് നിർബന്ധമാക്കുമെന്നും വി. ശിവൻകുട്ടി അറിയിച്ചു. എല്ലാ വിഷയത്തിലും നിർദ്ദിഷ്ട മിനിമം മാർക്ക് നേടേണ്ടതുണ്ടാകും. മാർക്ക് കുറവായാൽ, അനുയോജ്യമായ സമയത്തിനകം വീണ്ടും പരീക്ഷ എഴുതാൻ അവസരം നൽകുമെന്നും അദ്ദേഹം വ്യക്തമാക്കി.