ഓട്ടോറിക്ഷ യാത്രക്കാർ മുതൽ മീറ്റർ ഇടാതെ സർവീസ് നടത്തുന്ന ഡ്രൈവർമാർ വരെ ബാധിക്കുന്ന പുതിയ നടപടികളിലേക്ക് മോട്ടോർ വാഹനവകുപ്പ്. മീറ്റർ ഇല്ലാതെ ഓടിക്കുന്ന ഓട്ടോറിക്ഷകളിൽ ‘മീറ്റർ ഇല്ലെങ്കിൽ പണം നൽകേണ്ടതില്ല’ എന്ന സന്ദേശമുള്ള സ്റ്റിക്കർ പതിപ്പിക്കാൻ എംവിഡി നിർദേശിച്ചു. മാർച്ച് 1 മുതൽ ഇത് പാലിക്കാത്തവർക്ക് കടുത്ത നടപടികൾ നേരിടേണ്ടി വരും.
നിരവധി പരാതികളുടെ അടിസ്ഥാനത്തിലാണ് മോട്ടോർ വാഹനവകുപ്പ് ഈ കടുത്ത നടപടിയിലേക്ക് നീങ്ങുന്നത്. അമിത കൂലി ഈടാക്കൽ, മീറ്റർ ഉപയോഗിക്കാതെയുള്ള സർവീസ് എന്നിവക്കെതിരെ ശക്തമായ നടപടി സ്വീകരിക്കുമെന്നു ബന്ധപ്പെട്ട ഉദ്യോഗസ്ഥർ വ്യക്തമാക്കിയിട്ടുണ്ട്.
വയനാട്ടിലെ വാർത്തകൾ തൽസമയം അറിയാൻ വാട്സ്ആപ്പ് ഗ്രൂപ്പിൽ ജോയിൻ ചെയ്യുകhttps://chat.whatsapp.com/He6GJaaXJApLFGlSb9knVc
പെർമിറ്റ് റദ്ദാക്കും
മീറ്റർ ഇല്ലാതെ യാത്ര തുടരുന്നവർക്കെതിരെ ആദ്യ ഘട്ടത്തിൽ മുന്നറിയിപ്പുകൾ നൽകും. തുടർന്നും മീറ്റർ പതിപ്പിക്കാതെ സർവീസ് ചെയ്താൽ, പെർമിറ്റ് റദ്ദാക്കുന്നതിനുളള നടപടികൾ കൈക്കൊള്ളുമെന്ന് അധികൃതർ വ്യക്തമാക്കി.
ഡ്രൈവർമാർക്കു തന്നെ സ്റ്റിക്കർ പതിക്കേണ്ടതും നിർബന്ധം
യാത്രക്കാർക്ക് വ്യക്തത നൽകുന്നതിനായി ‘മീറ്റർ ഇല്ലെങ്കിൽ പണം നൽകേണ്ടതില്ല’ എന്ന സന്ദേശം ഉൾക്കൊള്ളുന്ന സ്റ്റിക്കറുകൾ ഓട്ടോ ഡ്രൈവർമാർക്കു തന്നെ പതിക്കേണ്ടതായിരിക്കും. ശനിയാഴ്ചയോ ഞായറാഴ്ചയോ ഇതുമായി ബന്ധപ്പെട്ട ഔദ്യോഗിക ഉത്തരവ് പുറത്തിറങ്ങും.
പ്രായോഗികതയെ കുറിച്ച് സംശയങ്ങൾ
ഇത് എത്രത്തോളം പ്രായോഗികമാകും എന്നതിനെക്കുറിച്ച് ഇതിനകം വിവിധ വൃത്തങ്ങളിൽ നിന്നും സംശയങ്ങൾ ഉയർന്നിട്ടുണ്ട്. എന്നാൽ പുതിയ നടപടികൾ ട്രാഫിക് നിയന്ത്രണവും യാത്രക്കാർക്ക് നീതിയുമൊരുക്കുമെന്നാണു അധികൃതർ പ്രതീക്ഷിക്കുന്നത്.