കേരളത്തിലെ തദ്ദേശ തിരഞ്ഞെടുപ്പുകള്‍ ഇടതുപക്ഷത്തിന് കഴിഞ്ഞ വര്‍ഷങ്ങളിലുടനീളം ശക്തമായ അനുകൂലതയുള്ളവയായിരുന്നു. യു.ഡി.എഫ് ഭരിച്ച കാലങ്ങളിലും തദ്ദേശ സ്വയംഭരണ സ്ഥാപനങ്ങളില്‍ ഇടതുപക്ഷം വ്യക്തമായ പ്രാബല്യം നിലനിര്‍ത്തി. അതിനു കാരണം ശക്തമായ സംഘടനാ ഘടനയും പ്രാദേശിക വിഷയങ്ങളില്‍ ഇടപെടുന്ന സജീവ പ്രവര്‍ത്തകരുമാണ്.
വയനാട്ടിലെ വാർത്തകൾ തൽസമയം അറിയാൻ വാട്സ്ആപ്പ് ഗ്രൂപ്പിൽ ജോയിൻ ചെയ്യുകhttps://chat.whatsapp.com/CyrYFy1m4b928e7srkZyve
എന്നാല്‍, ഈ തവണ തദ്ദേശ തെരഞ്ഞെടുപ്പില്‍ ഇടതുപക്ഷത്തിന് തിരിച്ചടി നേരിട്ടാല്‍, 2026-ലെ നിയമസഭാ തിരഞ്ഞെടുപ്പിലേക്കുള്ള രാഷ്ട്രീയ സാഹചര്യം പുതിയ വഴിത്തിരിവിലേക്ക് കടക്കാന്‍ സാധ്യതയുണ്ട്. ഇത്തവണയും ഇടതുപക്ഷം വിജയത്തിനുറപ്പ് പ്രകടിപ്പിക്കുന്നതിന്റെ പ്രധാന കാരണം, അധികാര വികേന്ദ്രീകരണത്തിന്റെ ഫലപ്രാപ്തിയുമായി ബന്ധപ്പെട്ട വികസന പ്രവര്‍ത്തനങ്ങളാണ്. കഴിഞ്ഞ ഒന്‍പത് വര്‍ഷമായി സര്‍ക്കാര്‍ പ്രാദേശിക വികസനം മുൻനിർത്തി വിവിധ പദ്ധതികൾ നടപ്പാക്കി. കുടുംബശ്രീ ഉള്‍പ്പെടെ വിവിധ സാമൂഹിക ക്ഷേമ പദ്ധതികള്‍ തദ്ദേശ ഭരണ സംവിധാനങ്ങളുമായി ബന്ധിപ്പിച്ച് ശക്തിപ്പെടുത്തി.
പൊതു വിദ്യാഭ്യാസ മേഖലയില്‍ വലിയ മാറ്റങ്ങള്‍ വരുത്തിയതും, ആരോഗ്യ മേഖലയിലെ വികസന പദ്ധതികളും കഴിഞ്ഞ തദ്ദേശ, നിയമസഭാ തെരഞ്ഞെടുപ്പുകളില്‍ ഇടതുപക്ഷത്തിന് അനുകൂലമായിരുന്നു. ഈ വിജയത്തിന്റെ ആവർത്തനമാണ് പാർട്ടി പ്രതീക്ഷിക്കുന്നത്. അതേസമയം, പ്രതീക്ഷയ്ക്കു വിരുദ്ധമായി തദ്ദേശ തിരഞ്ഞെടുപ്പില്‍ തിരിച്ചടി നേരിട്ടാൽ, 2026-ലെ നിയമസഭാ തിരഞ്ഞെടുപ്പിനുമുമ്പ് ഇടതുപക്ഷ നേതൃത്വത്തില്‍ മാറ്റം ആവശ്യമെന്ന ചർച്ച സജീവമാകാന്‍ ഇടയാകും.
അത്തരം സാഹചര്യത്തിൽ, കെ.കെ. ശൈലജ, പി. രാജീവ്, കെ. രാധാകൃഷ്ണന്‍ എന്നിവരുള്‍പ്പെടെ പുതുതലമുറ നേതാക്കളുടെ സാധ്യത പരിഗണിക്കപ്പെടുമെന്ന് രാഷ്ട്രീയ നിരീക്ഷകര്‍ വിലയിരുത്തുന്നു. നിലവിലെ സാഹചര്യങ്ങള്‍ അനുകൂലമാണെങ്കിലും, ബി.ജെ.പി-യുടെയും യു.ഡി.എഫ്-യുടെയും നിലപാടുകള്‍ അടുത്ത തിര‍ഞ്ഞെടുപ്പുകളെ എത്രത്തോളം ബാധിക്കും എന്നതും നിര്‍ണായകമായേക്കും.
തദ്ദേശ തിരഞ്ഞെടുപ്പിന്റെ ഫലമാണ് അടുത്ത നിയമസഭാ തെരഞ്ഞെടുപ്പിന് മുന്നൊരുക്കം നല്‍കുക. അതിനാൽ ഈ തെരഞ്ഞെടുപ്പ്, ഇടതുപക്ഷത്തിന് നിലനില്പ് ഉറപ്പിക്കാൻ നിർണ്ണായകമാകും.