കേരള ഹൈക്കോടതി ഇനി കോടതി നടപടികളുടെ വിവരങ്ങള്‍ വാട്‌സാപ്പിലൂടെ അറിയിക്കും. ഒക്ടോബര്‍ 6 മുതല്‍ ആരംഭിക്കുന്ന ഈ സംവിധാനം വഴി അഭിഭാഷകര്‍ക്കും കേസുകളുമായി ബന്ധപ്പെട്ടവര്‍ക്കും കോടതി നടപടികള്‍ കൃത്യസമയത്ത് ലഭ്യമാകും.വാട്സാപ്പ് വഴി ലഭിക്കുന്ന അപ്‌ഡേറ്റുകള്‍ കോടതിയിലെ നിലവിലുള്ള കമ്യൂണിക്കേഷന്‍ മാര്‍ഗങ്ങള്‍ക്കു പുറമെ നല്‍കുന്ന അധിക സേവനമാണ്. എന്നാല്‍ ഇത് ഔദ്യോഗിക സമന്‍സ്, നോട്ടീസ്, മറ്റ് നിയമപരമായ രേഖകള്‍ക്ക് പകരമല്ല. സമയബന്ധിത വിവരങ്ങള്‍ ലഭ്യമാക്കി ആശയവിനിമയത്തിലെ വൈകല്യങ്ങള്‍ ഒഴിവാക്കുക എന്നതാണ് പ്രധാന ലക്ഷ്യം.തട്ടിപ്പുകള്‍ ഒഴിവാക്കാന്‍, സന്ദേശങ്ങള്‍ ‘The High Court of Kerala’ എന്ന വെരിഫൈഡ് സെന്ററില്‍നിന്നാണോ വരുന്നതെന്ന് ഉറപ്പാക്കണമെന്നും, ആവശ്യത്തിന് കോടതിയുടെ ഔദ്യോഗിക വെബ് പോര്‍ട്ടലിലും വിവരങ്ങള്‍ പരിശോധിക്കണമെന്നും ഹൈക്കോടതി മുന്നറിയിപ്പ് നല്‍കിയിട്ടുണ്ട്.കോടതി നടപടികളെ കൂടുതല്‍ സുതാര്യവും ഡിജിറ്റല്‍ സൗഹൃദവുമാക്കാന്‍ ലക്ഷ്യമിടുന്ന പരിഷ്‌കാരങ്ങളുടേയും ഭാഗമാണ് ഈ പുതിയ പദ്ധതി.
കുട്ട – മാനന്തവാടി – പുറക്കാട്ടിരിഗ്രീന്‍ഫീല്‍ഡ് ഹൈവേ:കോഴിക്കോടിന്റെ സാമ്പത്തിക ഇടനാഴി
കേരളത്തിൽ നടപ്പാക്കാൻ പോകുന്ന ഗ്രീൻഫീൽഡ് ഹൈവേ പദ്ധതി സംസ്ഥാനത്തിന്റെ ഗതാഗത ഭൂപടത്തിൽ വലിയ മാറ്റങ്ങൾ കൊണ്ടുവരും. കോഴിക്കോട് മുതൽ പൂനെ, ഹൈദരാബാദ്, അമരാവതി, നാഗ്പൂർ തുടങ്ങി നിരവധി പ്രധാന നഗരങ്ങളിലേക്കുള്ള സമാന്തര പാതകൾ ഇതിനാൽ തുറന്നു കിട്ടും.മൈസൂർ, ബാംഗ്ലൂർ നഗരങ്ങളിലേക്കുള്ള രാത്രിയാത്രാ നിയന്ത്രണമില്ലാത്ത 24 മണിക്കൂർ ചരക്ക് ഗതാഗത പാത എന്ന നിലയിലും ഇത് പ്രാധാന്യം നേടും.കണ്ണൂർ വിമാനത്താവളം–കുറ്റ്യാടി നാലുവരിപ്പാത, സംസ്ഥാന–ദേശീയപാതകൾ, പണിപൂർ‍ത്തിയാകുന്ന മലയോര ഹൈവേ എന്നിവയുമായി ചേർന്നപ്പോൾ താമരശ്ശേരി ചുരത്തിനും കുറ്റ്യാടി ചുരത്തിനുമിടയിലെ മലയോര മേഖലയിൽ മികച്ച റോഡ് നെറ്റ്‌വർക്ക് രൂപപ്പെടും. ഇതോടെ ഇപ്പോഴും പിന്നാക്കം നിൽക്കുന്ന പ്രദേശങ്ങൾ വികസനത്തിനും ടൂറിസത്തിനും വലിയ അവസരം കണ്ടെത്തും.അകലാപ്പുഴ മുതൽ ബാണാസുരസാഗർ വരെയുള്ള വഴിയിൽ കടൽ, കായൽ, മലനിരകൾ തുടങ്ങി വൈവിധ്യമാർന്ന പ്രകൃതി കാഴ്ചകൾ ഈ ഹൈവേയ്ക്ക് ഇരുവശത്തും അനുഗമിക്കുന്നതാണ്. ഇതുവഴി ടൂറിസം വികസനം കൂടി പ്രതീക്ഷിക്കപ്പെടുന്നു.
കേരള പൊതുമേഖല സ്ഥാപനങ്ങളിൽ അക്കൗണ്ടന്റ് നിയമനം
കേരള സർക്കാരിന് കീഴിലുള്ള വിവിധ പൊതുമേഖല സ്ഥാപനങ്ങളിലേക്കായി അക്കൗണ്ടന്റ്, ജൂനിയർ അക്കൗണ്ടന്റ്, അക്കൗണ്ട്സ് അസിസ്റ്റന്റ്, അക്കൗണ്ട്സ് ക്ലർക്ക്, അസിസ്റ്റന്റ് മാനേജർ, അസിസ്റ്റന്റ് ഗ്രേഡ് II തുടങ്ങി വിവിധ തസ്തികകളിലേക്ക് നിയമനം നടത്തുന്നു. സംസ്ഥാനത്തെ നിരവധി കമ്പനികൾ, ബോർഡുകൾ, കോർപ്പറേഷനുകൾ എന്നിവയിൽ ഒഴിവുകൾ റിപ്പോർട്ട് ചെയ്തിട്ടുണ്ട്. നിയമനം ലഭിക്കുന്ന പ്രധാന സ്ഥാപനങ്ങളിൽ കേരള ഖാദി ആൻഡ് വില്ലേജ് ഇൻഡസ്ട്രീസ് ബോർഡ്, കേരള അർബൻ ആൻഡ് റൂറൽ ഡെവലപ്മെന്റ് ഫിനാൻസ് കോർപ്പറേഷൻ ലിമിറ്റഡ്, സ്റ്റേറ്റ് ഫാമിംഗ് കോർപ്പറേഷൻ ഓഫ് കേരള, കേരള ഷിപ്പിംഗ് & ഇൻലാൻഡ് നാവിഗേഷൻ കോർപ്പറേഷൻ, കേരള സംസ്ഥാന കൈത്തറി വികസന കോർപ്പറേഷൻ, കേരള സംസ്ഥാന ചലച്ചിത്ര വികസന കോർപ്പറേഷൻ, കേരള മിനറൽസ് ആൻഡ് മെറ്റൽസ് ലിമിറ്റഡ്, കേരള അഗ്രോ മെഷിനറി കോർപ്പറേഷൻ എന്നിവ ഉൾപ്പെടുന്നു.18 വയസ്സ് മുതൽ 36 വയസ്സ് വരെയുള്ളവർക്ക് അപേക്ഷിക്കാം. ഉദ്യോഗാർത്ഥികൾ 1989 ജനുവരി 2 മുതൽ 2007 ജനുവരി 1 വരെ ജനിച്ചവരായിരിക്കണം. നിയമാനുസൃതമായ പ്രായപരിധി ഇളവ് വിവിധ വിഭാഗങ്ങൾക്ക് ലഭ്യമാണ്. അപേക്ഷകർ അംഗീകൃത സർവകലാശാലയിൽ നിന്ന് ബി.കോം പാസായിരിക്കണം അല്ലെങ്കിൽ തത്തുല്യ യോഗ്യത നേടിയിരിക്കണം. ശമ്പളം നിയമനം ലഭിക്കുന്ന സ്ഥാപനത്തിന്റെ സ്‌കെയിലിൽ ആയിരിക്കും.താൽപര്യമുള്ളവർ കേരള പബ്ലിക് സർവീസ് കമ്മീഷന്റെ ഔദ്യോഗിക വെബ്‌സൈറ്റായ www.keralapsc.gov.in വഴി ‘ഒറ്റത്തവണ രജിസ്ട്രേഷൻ’ പൂർത്തിയാക്കി, സ്വന്തം പ്രൊഫൈലിൽ ലോഗിൻ ചെയ്ത് അപേക്ഷ സമർപ്പിക്കേണ്ടതാണ്. ഓരോ തസ്തികയ്ക്കും ‘Apply Now’ ബട്ടൺ ഉപയോഗിച്ചാണ് അപേക്ഷിക്കേണ്ടത്. അപേക്ഷാ ഫീസ് ഒന്നും ഇല്ല. അപേക്ഷിക്കുന്നതിന് മുൻപ് പ്രൊഫൈലിൽ നൽകിയിരിക്കുന്ന വിവരങ്ങൾ ശരിയാണെന്ന് ഉദ്യോഗാർത്ഥി ഉറപ്പാക്കണം.