ആധാർ കാർഡ് ഉടമകൾക്ക് ഇനി മുതൽ വലിയ സൗകര്യം. ഇനി പേര്, വിലാസം, ജനനത്തീയതി, മൊബൈൽ നമ്പർ തുടങ്ങിയ വ്യക്തിഗത വിവരങ്ങൾ പുതുക്കുന്നതിനായി അക്ഷയകേന്ദ്രങ്ങളിലോ നീണ്ട ക്യൂകളിലോ നിൽക്കേണ്ട ആവശ്യമില്ല. വീട്ടിൽ ഇരുന്ന് തന്നെ എല്ലാ തിരുത്തലുകളും ഓൺലൈനായി ചെയ്യാം.നവംബർ ഒന്നുമുതലാണ് പുതിയ സംവിധാനം പ്രാബല്യത്തിൽ വരുന്നത്. ആധാർ സേവനങ്ങളെ കൂടുതൽ വേഗതയേറിയതും സുരക്ഷിതവുമായും ഉപയോഗ സൗഹൃദവുമായും ആക്കുന്നതിനാണ് ഈ മാറ്റം. പുതിയ നിയമങ്ങൾ പ്രകാരം ഫീസ് ഘടനയും പുതുക്കിയിട്ടുണ്ട്, കൂടാതെ കുട്ടികളുടെ ആധാർ കാർഡ് സംബന്ധമായ ചില സേവനങ്ങൾ സൗജന്യമായി ലഭിക്കും.
🔹 ആധാറിലെ വിവരങ്ങൾ ഓൺലൈനായി പുതുക്കാം
മുമ്പ് ആധാറിൽ വിവരങ്ങൾ മാറ്റാൻ അക്ഷയകേന്ദ്രത്തിൽ പോകേണ്ടതുണ്ടായിരുന്നു. എന്നാൽ ഇനി അതിന്റെ ആവശ്യമില്ല. ഓഫീഷ്യൽ രേഖകളായ പാൻ കാർഡ്, പാസ്പോർട്ട്, ഡ്രൈവിംഗ് ലൈസൻസ്, റേഷൻ കാർഡ് എന്നിവ ഉപയോഗിച്ച് നിങ്ങളുടെ വിവരങ്ങൾ ഓൺലൈനായി പരിശോധിച്ച് തന്നെ സിസ്റ്റം ഉറപ്പാക്കും. ഇതിലൂടെ തിരുത്തൽ പ്രക്രിയ കൂടുതൽ വേഗതയേറിയതും സുരക്ഷിതവുമായിരിക്കും.
🔹 പുതുക്കിയ ഫീസ് ഘടന
പേര്, വിലാസം, മൊബൈൽ നമ്പർ എന്നിവ പുതുക്കൽ – ₹75
വിരലടയാളം, ഐറിസ് സ്കാൻ, ഫോട്ടോ എന്നിവ പുതുക്കൽ – ₹125
5 മുതൽ 7 വയസ്സും 15 മുതൽ 17 വയസ്സും വരെയുള്ള കുട്ടികൾക്ക് സൗജന്യ ബയോമെട്രിക് അപ്ഡേറ്റ്
2026 ജൂൺ 14 വരെ സൗജന്യ ഓൺലൈൻ ഡോക്യുമെന്റ് അപ്ഡേറ്റുകൾഅതിനുശേഷം എൻറോൾമെന്റ് സെന്ററിൽ ₹75 ചെലവാകും
ആധാർ അപേക്ഷകൾ – ₹40
ഹോം എൻറോൾമെന്റ് സേവനം – ആദ്യ വ്യക്തിക്ക് ₹700, ഓരോ അധിക വ്യക്തിക്കും ₹350
🔹 ആധാർ–പാൻ കാർഡ് ലിങ്കിംഗ് നിർബന്ധം
2025 ഡിസംബർ 31നകം ആധാറും പാൻ കാർഡും ബന്ധിപ്പിക്കണം.അത് ചെയ്യാതിരുന്നാൽ 2026 ജനുവരി 1 മുതൽ പാൻ കാർഡ് പ്രവർത്തനരഹിതമാകും, സാമ്പത്തിക ഇടപാടുകൾക്കും നികുതി ആവശ്യങ്ങൾക്കും അത് ഉപയോഗിക്കാനാകില്ല.പുതിയ പാൻ കാർഡ് അപേക്ഷകർക്കും ആധാർ പരിശോധന നിർബന്ധമായിരിക്കും.
🔹 KYC പ്രക്രിയ ഇനി കൂടുതൽ ലളിതംബാങ്കുകളും ധനകാര്യ സ്ഥാപനങ്ങളും നടത്തുന്ന KYC (Know Your Customer) പ്രക്രിയയും ഇനി കൂടുതൽ എളുപ്പം.
ഇനി മൂന്നു വഴികളിലൂടെ KYC പൂർത്തിയാക്കാം:
1. ആധാർ OTP പരിശോധന
2. വീഡിയോ KYC3. മുഖാമുഖ പരിശോധന-
ഈ പുതിയ നിയമങ്ങൾ ജനങ്ങളുടെ സമയം ലാഭിക്കുന്നതോടൊപ്പം വിവരങ്ങളുടെ സുരക്ഷയും ഉറപ്പാക്കുന്നു. ആധാർ സേവനങ്ങളിലെ ഈ വിപ്ലവകരമായ മാറ്റം ഇന്ത്യയിലെ പൗരന്മാർക്ക് കൂടുതൽ ഡിജിറ്റൽ സൗകര്യവും ഭരണനീതി ലളിതവുമാക്കും.
ആശാ വർക്കർമാർ പ്രതിഷേധം ശക്തമാക്കുന്നു; മുഖ്യമന്ത്രിയുടെ പ്രഖ്യാപനത്തിൽ നിരാശ
മുഖ്യമന്ത്രി പിണറായി വിജയൻ പ്രഖ്യാപിച്ച 1000 രൂപയുടെ ഓണറേറിയം വർധനവിൽ ആശാ വർക്കർമാർ നിരാശ പ്രകടിപ്പിച്ചു. ആവശ്യങ്ങൾ പൂർണ്ണമായി പരിഗണിക്കാത്തതിനാൽ സമരം തുടരാനാണ് സമരസമിതിയുടെ തീരുമാനം. പ്രതിദിനം 33 രൂപയുടെ വർധനവ് മാത്രമാണ് ലഭിക്കുന്നത് എന്നതാണ് ആശാ വർക്കർമാരുടെ പ്രധാന വാദം. മിനിമം കൂലി, വിരമിക്കൽ ആനുകൂല്യം എന്നിവയുമായി ബന്ധപ്പെട്ട പ്രധാന ആവശ്യങ്ങൾ സർക്കാർ അവഗണിച്ചതായി അവർ ആരോപിച്ചു.സെക്രട്ടേറിയറ്റ് പടിക്കൽ ആരംഭിച്ച ആശാ വർക്കർമാരുടെ സമരം ഇന്ന് 264-ാം ദിവസത്തിലേക്ക് കടന്നു. സമരസമിതിയുടെ യോഗം ഇന്ന് ചേരുകയും, അടുത്ത ഘട്ട സമരപരിപാടികൾ തീരുമാനിക്കുകയും ചെയ്യും. “ഓണറേറിയത്തിലെ വർധനവ് തുച്ഛമാണ്. വിരമിക്കൽ ആനുകൂല്യം പ്രഖ്യാപിക്കാതിരുന്നതും പ്രതിഷേധാർഹമാണ്,” എന്ന് സമരസമിതിയുടെ പ്രസ്താവനയിൽ വ്യക്തമാക്കിയിട്ടുണ്ട്.ഇതിനിടെ, അടുത്തുവരുന്ന തദ്ദേശ തിരഞ്ഞെടുപ്പിനെ മുൻനിർത്തി സർക്കാർ നിരവധി ക്ഷേമപദ്ധതി പ്രഖ്യാപനങ്ങളുമായി രംഗത്തെത്തി. മുഖ്യമന്ത്രി പിണറായി വിജയൻ നടത്തിയ പ്രഖ്യാപനങ്ങൾ പൊതുവെ ജനപ്രിയമായിരുന്നെങ്കിലും, ആശാ വർക്കർമാരുടെ പ്രതിഷേധം പുതിയ ചർച്ചകൾക്ക് വഴിവെച്ചിരിക്കുകയാണ്.പ്രഖ്യാപനങ്ങളുടെ ഭാഗമായി ക്ഷേമ പെൻഷൻ 1600 രൂപയിൽ നിന്ന് 2000 രൂപയായി ഉയർത്തി. കൂടാതെ, 35നും 60നും ഇടയിൽ പ്രായമുള്ള സാമ്പത്തികമായി പിന്നാക്കം നിൽക്കുന്ന സ്ത്രീകൾക്ക് പ്രതിമാസം 1000 രൂപയുടെ പുതിയ സഹായപദ്ധതി നടപ്പിലാക്കും. വാർഷിക വരുമാനം ഒരു ലക്ഷം രൂപയിൽ താഴെയുള്ള യുവാക്കൾക്കായി പ്രതിമാസം 1000 രൂപ സ്കോളർഷിപ്പ് അനുവദിച്ചിട്ടുണ്ട്.അങ്കണവാടി ജീവനക്കാർക്കും, സാക്ഷരതാ പ്രേരകർക്കും, ആശാ വർക്കർമാർക്കും 1000 രൂപയുടെ ഓണറേറിയം വർധനയും, സർക്കാർ ജീവനക്കാർക്കും പെൻഷൻകാർക്കും ഒരു ഗഡു ക്ഷാമബത്ത (ഡി.എ.)യും പ്രഖ്യാപിച്ചിട്ടുണ്ട്.ജനങ്ങൾക്ക് ആശ്വാസമാകുന്ന ഈ പ്രഖ്യാപനങ്ങൾക്കിടയിലും, വർഷങ്ങളായി നീണ്ടുനിൽക്കുന്ന ആവശ്യങ്ങൾക്ക് പരിഹാരം കാണാത്തതിൽ ആശാ വർക്കർമാർ അതൃപ്തരായി തുടരുകയാണ്. വിരമിക്കൽ ആനുകൂല്യം ഉറപ്പാക്കാതെ സമരം അവസാനിപ്പിക്കാനില്ലെന്ന നിലപാടിലാണ് സമരസമിതി.
സ്ത്രീകൾക്ക് സന്തോഷവാർത്ത ; പ്രതിമാസം ആയിരം രൂപ പെൻഷൻ പ്രഖ്യാപിച്ച് സര്ക്കാര്
സ്ത്രീകളുടെ ക്ഷേമത്തിനായി സംസ്ഥാന സർക്കാർ വലിയ പ്രഖ്യാപനവുമായി മുന്നോട്ട്. 35 മുതല് 60 വയസ്സ് വരെയുള്ള സാമൂഹ്യ ക്ഷേമ പെൻഷനുകള് ലഭിക്കാത്ത AAY, PHH വിഭാഗത്തില്പ്പെട്ട സ്ത്രീകള്ക്ക് പ്രതിമാസം ആയിരം രൂപ വീതം ലഭ്യമാക്കുന്ന “സ്ത്രീ സുരക്ഷ പെൻഷൻ പദ്ധതി” ആരംഭിക്കുമെന്ന് മുഖ്യമന്ത്രി പിണറായി വിജയൻ അറിയിച്ചു.ഇന്ന് ചേർന്ന മന്ത്രിസഭാ യോഗത്തിലെ തീരുമാനങ്ങൾ മാധ്യമങ്ങളെ അറിയിക്കുമ്പോഴായിരുന്നു മുഖ്യമന്ത്രിയുടെ ഈ പ്രഖ്യാപനം.സ്ത്രീകളുടെ സാമ്പത്തിക സുരക്ഷയും സാമൂഹിക ശക്തീകരണവും ലക്ഷ്യമാക്കിയാണ് ഈ പദ്ധതി നടപ്പിലാക്കുന്നത്. ക്ഷേമപെൻഷനുകളില് ഉള്പ്പെടാത്ത ട്രാൻസ്ജെൻഡർ സ്ത്രീകൾക്കും പ്രതിമാസം ആയിരം രൂപ സാമ്പത്തിക സഹായം ലഭ്യമാക്കുമെന്നും മുഖ്യമന്ത്രി വ്യക്തമാക്കി. സാമൂഹികമായും സാമ്പത്തികമായും പിന്നാക്കം നിൽക്കുന്ന സ്ത്രീകൾക്ക് ആശ്വാസമായിരിക്കും ഈ പദ്ധതി.ഇതോടൊപ്പം യുവതലമുറയ്ക്കായും സർക്കാർ നിരവധി പദ്ധതികൾ പ്രഖ്യാപിച്ചു. “Connect to Work” സ്കോളർഷിപ്പ് ഉൾപ്പെടെ, തൊഴിൽ ലഭിക്കുന്നതിനായി സ്റ്റൈപ്പൻഡ് അല്ലെങ്കിൽ സാമ്പത്തിക സഹായം ലഭിക്കുന്ന പദ്ധതികൾക്കും തുടക്കമാകും. പ്രതിവർഷ കുടുംബവരുമാനം ഒരു ലക്ഷം രൂപയിൽ താഴെയുള്ള ഏകദേശം അഞ്ച് ലക്ഷം യുവതീയുവാക്കൾക്ക് ഈ പദ്ധതികളിൽ നിന്നും ഗുണം ലഭിക്കുമെന്ന് സർക്കാർ പ്രതീക്ഷിക്കുന്നു. ഇതിനായി വർഷം 600 കോടി രൂപ ചെലവഴിക്കുമെന്ന് സർക്കാരിന്റെ കണക്ക് സൂചിപ്പിക്കുന്നു.
പിഎം കിസാൻ പദ്ധതിയിൽ കേരളത്തിലും ക്രമക്കേട്;അനര്ഹര് പണം കൈപ്പറ്റി
പ്രധാനമന്ത്രി കിസാൻ സമ്മാൻ നിധി പദ്ധതിയിൽ കേരളത്തിൽ ഗൗരവമായ ക്രമക്കേടുകൾ പുറത്തുവന്നു. സംസ്ഥാനത്ത് 7,694 കർഷക കുടുംബങ്ങൾ ഭർത്താവും ഭാര്യയും ഇരുവരും പദ്ധതിയുടെ ആനുകൂല്യം കൈപ്പറ്റിയതായി റിപ്പോർട്ടിൽ പറയുന്നു.ഇതിനു പുറമേ പ്രായപൂർത്തിയാകാത്ത മക്കളും മറ്റു ബന്ധുക്കളും ഉൾപ്പെടെ 33 അനർഹർക്കും പണം ലഭിച്ചതായും കണ്ടെത്തിയിട്ടുണ്ട്.സംസ്ഥാന സർക്കാർ ഈ വിവരങ്ങൾ കേന്ദ്ര കൃഷിമന്ത്രാലയത്തെ അറിയിച്ചതായി ഉറവിടങ്ങൾ വ്യക്തമാക്കി. പദ്ധതിയുടെ തുടക്കഘട്ടത്തിൽ ആധാർ അടിസ്ഥാനമാക്കിയ തിരിച്ചറിയൽ സംവിധാനമില്ലാതെ, അക്ഷയകേന്ദ്രങ്ങളിലൂടെയും പ്രാദേശിക മാർഗങ്ങളിലൂടെയും വിവരശേഖരണം നടത്തിയതാണ് ഇത്തരം പിഴവുകൾക്ക് പ്രധാന കാരണം എന്ന് റിപ്പോർട്ടിൽ പറയുന്നു.ക്രമക്കേട് കണ്ടെത്തിയതിനെ തുടർന്ന്, അനർഹരായവരെ പട്ടികയിൽ നിന്ന് ഒഴിവാക്കുകയും, ലഭിച്ച തുക തിരികെ കേന്ദ്ര സർക്കാരിന് കൈമാറാനുള്ള നടപടികളും സംസ്ഥാന കൃഷിവകുപ്പ് ആരംഭിച്ചിട്ടുണ്ട്.കേന്ദ്ര കൃഷിമന്ത്രാലയം എല്ലാ സംസ്ഥാനങ്ങളോടും പിഎം കിസാൻ പദ്ധതിയുടെ പ്രയോജനാർത്ഥികളുടെ വിശദമായ പട്ടിക ആവശ്യപ്പെട്ടിരുന്നു. പരിശോധനയിൽ രാജ്യമൊട്ടാകെ 29.13 ലക്ഷം അക്കൗണ്ടുകളിൽ ഒരേ കുടുംബത്തിലെ ഒരിലധികം പേർ ആനുകൂല്യം കൈപ്പറ്റിയതായി കേന്ദ്രം സ്ഥിരീകരിച്ചു.പ്രതിവർഷം 6,000 രൂപ മൂന്നു ഘട്ടങ്ങളായി നേരിട്ട് കർഷകരുടെ ബാങ്ക് അക്കൗണ്ടിലേക്ക് നൽകുന്ന പദ്ധതിയാണ് പിഎം കിസാൻ.ചെറുകിട കർഷകരെ സാമ്പത്തികമായി സഹായിക്കാനുള്ള ഉദ്ദേശ്യത്തോടെ ആരംഭിച്ച പദ്ധതിയാണിത്. എന്നാൽ, ഇപ്പോഴത്തെ വെളിപ്പെടുത്തലുകൾ പദ്ധതിയുടെ പരസ്യമായ ഉപയോഗത്തെയും നിയന്ത്രണങ്ങളെയും ചോദ്യം ചെയ്യപ്പെടുന്ന തരത്തിലേക്ക് കാര്യങ്ങളെ നയിക്കുന്നു.
വന്യജീവി ആക്രമണങ്ങൾക്ക് വിരാമം; സോളാർ ഫെൻസിംഗ് അറ്റകുറ്റപ്പണി ഇനി വനംവകുപ്പ് ജീവനക്കാരുടെ ചുമതല
വന്യജീവി ആക്രമണം കുറയ്ക്കാനും മനുഷ്യ-വന്യജീവി സംഘർഷം നിയന്ത്രിക്കാനുമായി സംസ്ഥാനത്ത് നടപ്പിലാക്കിയ സോളാർ ഫെൻസിംഗ് പദ്ധതിയിൽ വലിയ മാറ്റങ്ങൾ. ഇനി മുതൽ തകരാറിലായ ഫെൻസിംഗുകളുടെ അറ്റകുറ്റപ്പണി വനംവകുപ്പ് ജീവനക്കാർ തന്നെയായിരിക്കും നടത്തുക. ഇതിനായി സംസ്ഥാനവ്യാപകമായി ആദ്യഘട്ട പരിശീലനം പൂർത്തിയായി.മനുഷ്യ-വന്യജീവി സംഘർഷ ലഘൂകരണ പദ്ധതിയുടെ ഭാഗമായാണ് ഈ പ്രധാന തീരുമാനം.കാട്ടാനകൾ ജനവാസ പ്രദേശങ്ങളിലേക്ക് കടന്നുവരുന്നത് വലിയ വെല്ലുവിളിയായതിനെ തുടർന്ന്, സോളാർ ഫെൻസിംഗ് ഏറ്റവും ഫലപ്രദമായ പ്രതിരോധ മാർഗമെന്ന നിലയിൽ വകുപ്പിന്റെ വിലയിരുത്തലുണ്ട്. എന്നാൽ ഇതുവരെ കരാർ മാർഗം അറ്റകുറ്റപ്പണി നടത്തുന്നതിനാൽ താമസം നേരിടുകയും, അതുവഴി നിരവധി ആക്രമണങ്ങൾ സംഭവിക്കുകയും ചെയ്തിരുന്നു. ഇതിന് പരിഹാരമായി, ഇനി വനംവകുപ്പ് ജീവനക്കാർക്ക് നേരിട്ട് അറ്റകുറ്റപ്പണി നിർവഹിക്കാനാവുന്ന സംവിധാനമാണ് ഒരുക്കുന്നത്.ആദ്യഘട്ടത്തിൽ 1500 ജീവനക്കാർക്ക് പരിശീലനം നൽകി, ഇവർ ഓരോ വനംസ്റ്റേഷനുകളിലെയും സഹപ്രവർത്തകരെ പരിശീലിപ്പിക്കാനുള്ള ചുമതലയും ലഭിച്ചിട്ടുണ്ട്. സ്റ്റേഷനുകളിൽ ആവശ്യമായ ഉപകരണങ്ങളുമായി ടൂൾ റൂമുകൾ സ്ഥാപിച്ച് തകരാറുകൾ ഉടൻ പരിഹരിക്കാനുള്ള സംവിധാനം ഒരുക്കും. നിലവിൽ പട്രോളിംഗ് മുഖാന്തരമാണ് ഫെൻസിംഗ് തകരാറുകൾ കണ്ടെത്തുന്നത്. എന്നാൽ പഴയ രീതിക്ക് പകരമായി, സിം കാർഡ് സംവിധാനമുള്ള സ്മാർട്ട് ഫെൻസിംഗ് സംവിധാനമാണ് പരീക്ഷണാടിസ്ഥാനത്തിൽ നടപ്പിലാക്കുന്നത്.നോർത്ത് വയനാട് ഡിവിഷനിലാണ് ഈ പുതിയ സ്മാർട്ട് ഫെൻസിംഗ് സംവിധാനം പരീക്ഷണം ആരംഭിച്ചിരിക്കുന്നത്. പദ്ധതി വിജയകരമാകുന്നുവെന്ന് തെളിഞ്ഞാൽ, അത് സംസ്ഥാനത്തുടനീളം പ്രയോഗിക്കാനുള്ള പദ്ധതി വനംവകുപ്പിന് ഉണ്ട്.വകുപ്പിന്റെ കണക്കുകൾ പ്രകാരം, സംസ്ഥാനത്ത് 4500 കിലോമീറ്റർ നീളത്തിൽ സോളാർ ഫെൻസിംഗ് സ്ഥാപിച്ചാൽ വന്യജീവി ആക്രമണങ്ങൾ ഗണ്യമായി കുറയ്ക്കാനാകും. ഇതിനകം 2500 കിലോമീറ്ററിൽ ഫെൻസിംഗ് പൂർത്തിയായിട്ടുണ്ട്, 800 കിലോമീറ്റർ ഭാഗത്ത് പ്രവർത്തനങ്ങൾ പുരോഗമിക്കുന്നു. ബാക്കിയുള്ള പ്രദേശങ്ങളിൽ ഫെൻസിംഗ് സ്ഥാപിക്കുന്നതിനുള്ള സമഗ്ര പദ്ധതി സർക്കാർ പരിഗണനയിലാണ്. പദ്ധതി പൂർത്തിയായാൽ, വനാതിർത്തികളിൽ സുരക്ഷ ഉറപ്പാക്കാനും കാട്ടാനകളുടെ അപ്രതീക്ഷിത കയറ്റങ്ങൾ തടയാനും വലിയ സഹായമാകും എന്ന് വനംവകുപ്പ് പ്രതീക്ഷിക്കുന്നു.
മാനന്തവാടിയിൽ തെരുവുനായ ഭീഷണി വർധിക്കുന്നു;ഭയത്തോടെ കാൽനടയാത്രക്കാർ
മാനന്തവാടി: മാനന്തവാടി ടൗണിലെ മൈസൂർ റോഡ് ഭാഗത്ത് തെരുവുനായ ശല്യം ദിനംപ്രതി രൂക്ഷമാകുകയാണ്. രാത്രി ഏഴ് മണിക്ക് ശേഷമേ വഴിയിലൂടെ നടക്കാൻ നാട്ടുകാർക്ക് ധൈര്യമുള്ളൂ. എട്ടു മുതൽ പത്തു നായ്ക്കൾവരെ കൂട്ടമായി തെരുവുകളിൽ ഇറങ്ങി കാൽനടയാത്രക്കാരെയും ഇരുചക്രവാഹന യാത്രക്കാരെയും ഭീതിയിലാക്കുകയാണ്.വാഹനങ്ങൾക്ക് മുന്നിൽ നായ്ക്കൾ ചാടുന്നതും അപ്രതീക്ഷിതമായി കൂട്ടമായി ഓടുന്നതുമൂലം അപകടസാധ്യത ഉയർന്നിരിക്കുകയാണ്. പ്രത്യേകിച്ച് ജോലിക്കഴിഞ്ഞ് വീട്ടിലേക്ക് മടങ്ങുന്ന സ്ത്രീകളും വിദ്യാർത്ഥികളും ഏറെ ഭീതിയിലാണ്. സമീപത്തെ വ്യാപാരികളും രാത്രിയോടെ കട അടയ്ക്കാൻ പോലും ബുദ്ധിമുട്ടുന്നതായി പറയുന്നു.ചില ദിവസങ്ങൾ മുൻപ് എൽ.എഫ്. യു.പി. സ്കൂളിന് സമീപം രണ്ട് പേർക്ക് തെരുവുനായയുടെ കടിയേറ്റ സംഭവവും നാട്ടിൽ ആശങ്ക വർധിപ്പിച്ചിട്ടുണ്ട്. എന്നാൽ ഇത്രയും പരാതികൾ ഉയർന്നിട്ടും വിഷയത്തിൽ ഭരണകൂടം യാതൊരു ഗൗരവമായ ഇടപെടലും നടത്തിയിട്ടില്ലെന്നാണ് നാട്ടുകാരുടെ ആരോപണം.“മറ്റൊരു വലിയ ദുരന്തം സംഭവിച്ചതിന് ശേഷമേ അധികാരികൾ കണ്ണുതുറക്കൂവോ?” എന്നതാണ് നാട്ടുകാർ ഉയർത്തുന്ന ചോദ്യം. തെരുവുനായ ശല്യത്തെ നേരിടാൻ അടിയന്തര നടപടി സ്വീകരിക്കണമെന്നും ജനങ്ങൾ സുരക്ഷിതമായി സഞ്ചരിക്കാൻ വേണ്ട സാഹചര്യം ഉറപ്പാക്കണമെന്നും അവർ ആവശ്യപ്പെട്ടു.
മക്കിമലയിൽ ആശ്രമം സ്കൂളിനായി പണിത കെട്ടിടങ്ങൾ നശിക്കുന്നു; മനുഷ്യാവകാശ കമ്മീഷൻ അന്വേഷണ ഉത്തരവിട്ടു
കല്പറ്റ:വയനാടിലെ മക്കിമലയിൽ ആശ്രമം സ്കൂളിനായി നിർമിച്ച കെട്ടിടങ്ങൾ പരിചരണമില്ലാതെ നശിച്ചുപോകുന്നതായി ഉയർന്ന പരാതിയെ തുടര്ന്ന് മനുഷ്യാവകാശ കമ്മീഷൻ സ്വമേധയാ കേസെടുത്തു. ജില്ലാ കളക്ടറും മാനന്തവാടി ട്രൈബൽ ഡെവലപ്മെന്റ് ഓഫീസറും വിഷയത്തിൽ അന്വേഷണം നടത്തി പത്ത് ദിവസത്തിനകം റിപ്പോർട്ട് സമർപ്പിക്കണമെന്ന് കമ്മീഷൻ ജുഡീഷ്യൽ അംഗം കെ. ബൈജുനാഥ് നിർദേശിച്ചു.മാധ്യമവാർത്തകളുടെ അടിസ്ഥാനത്തിലാണ് കമ്മീഷന്റെ നടപടി. ബത്തേരിയിൽ അടുത്ത മാസം നടക്കാനിരിക്കുന്ന സിറ്റിംഗിൽ കേസ് പരിഗണിക്കും. തവിഞ്ഞാൽ പഞ്ചായത്തിലെ തലപ്പുഴ മക്കിമലയിലേക്കാണ് തിരുനെല്ലി മോഡൽ റസിഡൻഷ്യൽ സ്കൂൾ മാറ്റാനായി കോടികൾ ചെലവഴിച്ച് കെട്ടിടനിർമാണം ആരംഭിച്ചത്. എന്നാൽ പിന്നീട് ആറളം ഫാമിലേക്ക് സ്കൂൾ മാറ്റാനുള്ള തീരുമാനം പ്രതിഷേധത്തിന് വഴിവെച്ചിരുന്നു.നിർമാണം പൂർത്തിയാകാതെ കാട് മൂടി നശിച്ചുകിടക്കുന്ന കെട്ടിടങ്ങൾ ഇപ്പോൾ പൊതു പണത്തിന്റെ പാഴാക്കലായിത്തീരുന്നതായി നാട്ടുകാർ ആരോപിക്കുന്നു. ഇവിടെ മുൻപ് കലിംഗ മോഡൽ സർവകലാശാല സ്ഥാപിക്കാനുള്ള പദ്ധതിയുമുണ്ടായിരുന്നു.