ഇന്ന് സംസ്ഥാനത്ത് സ്വർണവിലയിൽ ശക്തമായ വർധനവ് രേഖപ്പെടുത്തി. കഴിഞ്ഞ ദിവസങ്ങളിൽ വിലയിൽ ഉണ്ടായ ഇടിവുകൾക്കുശേഷമാണ് പവന് ₹1360 എന്ന ഒറ്റയടിക്ക് ഉയർച്ച സംഭവിച്ചത്. ഇന്നലെ രാവിലെയോടെ പവന് ₹320യും വൈകുന്നേരത്തോടെ ₹360യും കുറഞ്ഞതിനെ തുടര്ന്നുണ്ടായ ഈ വിലമാറ്റം സാധാരണ ഉപഭോക്താക്കളെ ആശങ്കയിലാക്കിയിരിക്കുകയാണ്.
ഏറ്റവും പുതിയ നിരക്കുകൾ പ്രകാരം സംസ്ഥാനത്ത് ഒരു പവൻ സ്വർണത്തിന്റെ വില ₹91,280 ആയി ഉയർന്നിരിക്കുമ്പോൾ, ഒരു ഗ്രാം സ്വർണത്തിന് ₹11,535 നൽകേണ്ട സാഹചര്യം ആണ്. ഇതിന് പുറമെ പണിക്കൂലി, ജിഎസ്ടി, ഹാൾമാർക്കിംഗ് ഫീസ് എന്നിവ ചേർന്നാൽ ആഭരണങ്ങളുടെ യഥാർത്ഥ വില ഇതിലും കൂടുതലാകും. സാധാരണയായി 5 ശതമാനമാണ് ഏറ്റവും കുറഞ്ഞ പണിക്കൂലി എന്നതും ശ്രദ്ധേയമാണ്.സ്വർണവിലയിൽ ദിവസേന ഉണ്ടാകുന്ന ഉയർച്ചയും ഇടിവും നിരീക്ഷിച്ച് വാങ്ങലിന് ഏറ്റവും അനുയോജ്യമായ സമയം തിരഞ്ഞെടുത്താണ് ഉപഭോക്താക്കൾ ഇടപാടുകൾ നടത്തുന്നത്. ഇന്ത്യ ലോകത്തിലെ ഏറ്റവും വലിയ സ്വർണ ഉപഭോക്താക്കളിൽ ഒന്നായതിനാൽ ആഗോള വിപണിയിൽ നടക്കുന്ന ചെറിയ മാറ്റങ്ങൾ പോലും നേരിട്ട് ഇന്ത്യൻ വിപണിയെ ബാധിക്കുന്നുണ്ട്. ഡോളറിനോടുള്ള രൂപയുടെ മൂല്യത്തെ ബാധിക്കുന്ന സാമ്പത്തിക സാഹചര്യം, അന്താരാഷ്ട്ര സ്വർണവിലയിലെ ചലനങ്ങൾ, നിക്ഷേപ പ്രവണതകൾ എന്നിവയാണ് വില ഉയരാൻ പ്രധാന കാരണങ്ങൾ. ഇതോടൊപ്പം വെള്ളിയുടെ നിരക്കും അന്താരാഷ്ട്ര വിപണിയുടെയും രൂപ–ഡോളർ മൂല്യത്തിന്റെയും മാറ്റങ്ങൾ ആശ്രയിച്ചാണ് രൂപപ്പെടുന്നത്. ഇപ്പോഴത്തെ സാഹചര്യം തുടരുകയാണെങ്കിൽ അടുത്ത ദിവസങ്ങളിലും സ്വർണവിലയിൽ മാറ്റങ്ങൾ സംഭവിക്കാനിടയുണ്ടെന്നാണ് വിലയിരുത്തൽ.
ഇന്നുമുതൽ 4 പുതിയ തൊഴിൽ നിയമങ്ങൾ പ്രാബല്യത്തിൽ; ശക്തമായ പ്രതിഷേധം തള്ളി കേന്ദ്ര സർക്കാർ
ന്യൂഡൽഹി: രാജ്യത്തെ തൊഴിൽ രംഗത്ത് വലിയ മാറ്റവുമായി പുതിയ നാല് തൊഴിൽ കോഡുകൾ ഇന്ന് മുതൽ പ്രാബല്യത്തിൽ. പഴയ 40 തൊഴിൽ നിയമങ്ങൾക്ക് പകരമായാണ് പുതിയ ലേബർ കോഡുകൾ നടപ്പിലാക്കുന്നതെന്ന് പ്രധാനമന്ത്രി നരേന്ദ്രമോദി അറിയിച്ചു.പുതിയ നിയമങ്ങൾ പ്രകാരം വേതന കോഡ്, വ്യാവസായിക ബന്ധ കോഡ്, സാമൂഹിക സുരക്ഷാ കോഡ്, കൂടാതെ തൊഴിൽ ആരോഗ്യവും സുരക്ഷയും ജോലി സാഹചര്യങ്ങളും സംബന്ധിച്ച കോഡ് എന്നിവയാണ് നിലവിൽ വന്നിരിക്കുന്നത്. സർക്കാർ വ്യക്തമാക്കുന്നത് പ്രകാരം, തൊഴിലാളികളുടെ ക്ഷേമവും തൊഴിൽ മേഖലയുടെ ഏകീകരണവും ലക്ഷ്യമിട്ടാണ് മാറ്റങ്ങൾ നടപ്പിലാക്കുന്നത്.എന്നാൽ, പുതിയ നിയമങ്ങൾ തൊഴിലാളികളുടെ അവകാശങ്ങൾ ദുർബലപ്പെടുത്തുന്നതാണെന്നാരോപിച്ച് പ്രതിപക്ഷം ശക്തമായ പ്രതിഷേധം ഉയർത്തിയിരുന്നു. ഈ വിമർശനങ്ങളെ പരിഗണിച്ചിട്ടും, സാമ്പത്തിക വളർച്ചയ്ക്കും Ease of Doing Business ലക്ഷ്യങ്ങൾക്കും വലിയ പ്രോത്സാഹനമാകുമെന്നാണ് സർക്കാരിന്റെ വിലയിരുത്തൽ.സ്വാതന്ത്ര്യാനന്തരകാലത്ത് തൊഴിലാളി നിയമങ്ങളിൽ ഇത്ര വലിയ മാറ്റം വരുത്തുന്നത് ആദ്യമായാണെന്നും, തൊഴിൽ മേഖലയിൽ സുതാര്യതയും കാര്യക്ഷമതയും ഉറപ്പാക്കാനാണ് ഈ പരിഷ്കാരം എന്നും പ്രധാനമന്ത്രി മോദി വ്യക്തമാക്കി.
തദ്ദേശ തെരഞ്ഞെടുപ്പ്: ജില്ലാ പഞ്ചായത്തിൽ 41 സ്ഥാനാർത്ഥികൾ കൂടി നാമനിർദേശ പത്രിക നൽകി
ത ദ്ദേശ തെരഞ്ഞെടുപ്പിനായി ജില്ലാ പഞ്ചായത്തിലെ വിവിധ ഡിവിഷനുകളിലേക്ക് അവസാനദിനമായ ഇന്നലെ ( നവംബർ 21) 41 സ്ഥാനാർത്ഥികൾ കൂടി നാമനിർദേശ പത്രിക സമർപ്പിച്ചു. ഇതുവരെ 85 സ്ഥാനാർത്ഥികളാണ് പത്രിക നൽകിയത്. ഇന്ന് (നവംബർ 22ന്) പത്രികകളുടെ സൂക്ഷ്മ പരിശോധന നടക്കും. സ്ഥാനാര്ത്ഥിത്വം പിൻവലിക്കാനുള്ള സമയപരിധി നവംബര് 24 തിങ്കളാഴ്ച വരെയാണ്.ജില്ലാ പഞ്ചായത്തിലേക്ക് ഇന്നലെ പത്രിക സമർപ്പിച്ചവരുടെ വിവരങ്ങൾ:തവിഞ്ഞാൽ – ലിസി (ഇന്ത്യൻ നാഷണൽ കോൺഗ്രസ്), തിരുനെല്ലി – ഫിലിപ്പ് ജോർജ് (ഇന്ത്യൻ നാഷണൽ കോൺഗ്രസ്), മോഹൻദാസ് (ഭാരതീയ ജനതാ പാർട്ടി), പനമരം – ബീന (ഇന്ത്യൻ നാഷണൽ കോൺഗ്രസ്), രമ – ഭാരതീയ ജനതാ പാർട്ടി), മുള്ളൻകൊല്ലി – ഗിരിജ (ഇന്ത്യൻ നാഷണൽ കോൺഗ്രസ്), മുകുന്ദൻ (ഭാരതീയ ജനതാ പാർട്ടി), ചന്തുണ്ണി ( സ്വതന്ത്രൻ), കേണിച്ചിറ – അമൽ ജോയ് (ഇന്ത്യൻ നാഷണൽ കോൺഗ്രസ്), കലേഷ് (ഭാരതീയ ജനതാ പാർട്ടി), കണിയാമ്പറ്റ – സുനിൽ കുമാർ (ഇന്ത്യൻ യൂണിയൻ മുസ്ലിം ലീഗ്), ശരത് കുമാർ – (ഭാരതീയ ജനതാ പാർട്ടി), മീനങ്ങാടി- ശ്രീനിവാസൻ (ഭാരതീയ ജനതാ പാർട്ടി), ഗൗതം ഗോകുൽദാസ് (ഇന്ത്യൻ നാഷണൽ കോൺഗ്രസ്), നൂൽപ്പുഴ – ഷീജ (ഇന്ത്യൻ നാഷണൽ കോൺഗ്രസ്), സാവിത്രി (ഭാരതീയ ജനതാ പാർട്ടി), അമ്പലവയൽ- ജിനി (ഇന്ത്യൻ നാഷണൽ കോൺഗ്രസ്), ഏലിയാമ്മ ( ഭാരതീയ ജനതാ പാർട്ടി), തോമാട്ട്ചാൽ – ബാലൻ (ഇന്ത്യൻ നാഷണൽ കോൺഗ്രസ്), സദാനന്ദൻ (ഭാരതീയ ജനതാ പാർട്ടി), ജഷീർ (സ്വതന്ത്രൻ), മുട്ടിൽ- ഹേമലത (ഭാരതീയ ജനതാ പാർട്ടി), ജോഷിലാറാണി (കമ്മ്യൂണിസ്റ്റ് പാർട്ടി ഓഫ് ഇന്ത്യ, മാർക്സിസ്റ്റ്), നസീമ (ഇന്ത്യൻ യൂണിയൻ മുസ്ലിം ലീഗ്), മേപ്പാടി – തമ്പി (കമ്മ്യൂണിസ്റ്റ് പാർട്ടി ഓഫ് ഇന്ത്യ), സുഭിഷ് ( ഭാരതീയ ജനതാ പാർട്ടി), വൈത്തിരി – ചന്ദ്രിക (ഇന്ത്യൻ നാഷണൽ കോൺഗ്രസ്), സിന്ധു (ഭാരതീയ ജനതാ പാർട്ടി), പടിഞ്ഞാറത്തറ – ശാരദ (രാഷ്ട്രീയ ജനതാദൾ ), സോണി (ഇന്ത്യൻ യൂണിയൻ മുസ്ലിം ലീഗ്), ചന്ദ്രിക (ഭാരതീയ ജനതാ പാർട്ടി), തരുവണ – ശോഭന (കമ്മ്യൂണിസ്റ്റ് പാർട്ടി ഓഫ് ഇന്ത്യ, മാർക്സിസ്റ്റ്), മുഫീദ തെസ്നി ( ഇന്ത്യൻ യൂണിയൻ മുസ്ലിം ലീഗ്), ബിജിഷകുമാരി (ഭാരതീയ ജനതാ പാർട്ടി), എടവക- ജിൽസൺ (ഇന്ത്യൻ നാഷണൽ കോൺഗ്രസ്), വെള്ളമുണ്ട- ശ്രീജിത (ഭാരതീയ ജനതാ പാർട്ടി).
എസ്ഐആർ പരിശോധനയിൽ മാറ്റമില്ല;കേരളത്തിന്റെ ആവശ്യം കേൾക്കാതെ കോടതി മുന്നോട്ട്
വോട്ടർ പട്ടികയുടെ അതിതീവ്ര പരിശോധന (SIR) സംബന്ധിച്ച കേസിൽ കേരള സർക്കാരിന്റെ ഹർജിക്ക് സുപ്രീം കോടതിയിൽ ഇന്ന് പ്രതീക്ഷിച്ചിരുന്ന താൽക്കാലിക സ്റ്റേ ലഭിച്ചില്ല. കേസ് മുന്നോട്ടു കേൾക്കാമെന്ന് മാത്രമാണ് കോടതി പറഞ്ഞത്, അതോടെ സംസ്ഥാനത്തിനും വിഷയത്തെ പിന്തുണക്കുന്ന പാർട്ടികൾക്കും നിരാശയാണ്.പിണറായി സർക്കാരിനൊപ്പം മുസ്ലിം ലീഗ് ഉൾപ്പെടെ ചില രാഷ്ട്രീയ പാർട്ടികളും എസ്ഐആർ ഭരണഘടനാ വിരുദ്ധമാണെന്നും ഉടൻ നിർത്തിവെക്കണമെന്നുമാണ് കോടതിയിൽ ആവശ്യപ്പെട്ടത്. എന്നാൽ, വിഷയത്തിൽ തെരഞ്ഞെടുപ്പ് കമ്മീഷന്റെ നിലപാട് ആദ്യം അറിയണമെന്നാണ് സുപ്രീം കോടതിയുടെ നിർദേശം.ദേശത്തിന്റെ വിവിധ ഹൈക്കോടതികളിൽ സമാനമായ കേസുകളിൽ തെരഞ്ഞെടുപ്പ് കമ്മീഷൻ ഇതിനകം തന്നെ എസ്ഐആറിന്റെ ആവശ്യകത വിശദീകരിച്ചിട്ടുണ്ടെന്ന് കോടതിയിൽ ചൂണ്ടിക്കാട്ടപ്പെട്ടിട്ടുണ്ട്. എന്നാൽ, കേരളത്തിന്റെ വാദം അതില്നിന്ന് വ്യത്യസ്തമാണ്. ഇപ്പോൾ തദ്ദേശസ്വയംഭരണ തിരഞ്ഞെടുപ്പ് നടപടികൾ നടക്കുന്നതിനാൽ എസ്ഐആർ താൽക്കാലികമായി മാറ്റിവെക്കണമെന്നാണ് സംസ്ഥാനത്ത് ആവശ്യപ്പെട്ടത്.ഈ വാദം കോടതിയെ പ്രേരിപ്പിക്കാനാകാത്തതിനാലാണ് താൽക്കാലിക സ്റ്റേ അനുവദിക്കാത്തതെന്നാണ് നിയമവൃത്തങ്ങളിൽ നിന്നുള്ള സൂചന. അടുത്ത കേൾവിയ്ക്കായി കോടതി തീയതി നിശ്ചയിച്ചിട്ടില്ല.