കേരള ഫയർ ആന്റ് റെസ്‌ക്യൂ സർവീസിൽ വനിതകൾക്കായി പ്രത്യേക റിക്രൂട്ട്മെന്റ് വിജ്ഞാപനം പുറത്തിറങ്ങിയിട്ടുണ്ട്. വനിത ഫയർ ആന്റ് റെസ്‌ക്യൂ ഓഫീസർ (ട്രെയിനി) തസ്തികയിലേക്കുള്ള നിയമനം കേരള പബ്ലിക് സർവീസ് കമ്മീഷൻ (PSC) മുഖേനയാണ് നടക്കുന്നത്. പ്ലസ് ടു യോഗ്യതയുള്ള, സ്ഥിരസേനയിൽ ജോലി ആഗ്രഹിക്കുന്നവർക്ക് മികച്ച അവസരമാണിത്. അപേക്ഷ സമർപ്പിക്കേണ്ട അവസാന തീയതി സെപ്റ്റംബർ 3 ആണെന്ന് അറിയിച്ചിട്ടുണ്ട്.ആകെ നാല് ഒഴിവുകളാണ് പ്രഖ്യാപിച്ചിരിക്കുന്നത്. തിരുവനന്തപുരം, എറണാകുളം, തൃശൂർ, പാലക്കാട് ജില്ലകളിൽ ഓരോ ഒഴിവ് വീതമാണ് ലഭ്യമാകുന്നത്. ഇതിന്റെ കാറ്റഗറി നമ്പർ 215/2025 ആണ്. തിരഞ്ഞെടുക്കപ്പെടുന്ന ഉദ്യോഗാർത്ഥികൾക്ക് പ്രതിമാസം ₹27,900 മുതൽ ₹63,700 വരെ ശമ്പളം ലഭിക്കും.അപേക്ഷിക്കാൻ 18 മുതൽ 26 വയസ് വരെയുള്ള വനിതകൾക്കാണ് യോഗ്യത. സംവരണ വിഭാഗങ്ങളിൽ പെട്ട എസ്.സി, എസ്.ടി, ഒബിസി വിഭാഗക്കാർക്ക് നിയമാനുസൃതമായ പ്രായ ഇളവ് അനുവദിച്ചിട്ടുണ്ട്. പ്ലസ് ടു അല്ലെങ്കിൽ തത്തുല്യ യോഗ്യത നിർബന്ധമാണ്, കൂടാതെ കമ്പ്യൂട്ടർ ആപ്ലിക്കേഷൻ ഡിപ്ലോമയുള്ളവർക്ക് മുൻഗണന ലഭിക്കും. പുരുഷന്മാർക്കും ഭിന്നശേഷിയുള്ള ഉദ്യോഗാർത്ഥികൾക്കും അപേക്ഷിക്കാൻ സാധിക്കില്ല.ഫിസിക്കൽ മാനദണ്ഡങ്ങൾ പ്രകാരം, സ്ത്രീകൾക്ക് കുറഞ്ഞത് 152 സെ.മീ ഉയരം ആവശ്യമാണ്. പട്ടികജാതി/പട്ടികവർഗ വിഭാഗക്കാർക്ക് 150 സെ.മീ മതിയാകും. അപേക്ഷകർക്ക് നീന്തൽ പരിജ്ഞാനം നിർബന്ധമാണ്, അതായത് രണ്ട് മിനുട്ട് പതിനഞ്ച് സെക്കൻഡിനുള്ളിൽ 50 മീറ്റർ നീന്തണം. മെഡിക്കൽ ഫിറ്റ്‌നസ്, കാഴ്ചശക്തി തുടങ്ങിയവയും ആവശ്യമാണ്.ഫിസിക്കൽ ടെസ്റ്റിൽ 8 ഇനങ്ങളിൽ കുറഞ്ഞത് 5 ഇനങ്ങളിൽ വിജയിക്കണം. ഇതിൽ 100 മീറ്റർ ഓട്ടം (17 സെക്കൻഡ്), ഹൈജമ്പ് (106 സെ.മീ), ലോംഗ് ജമ്പ് (305 സെ.മീ), ഷോട്ട് പുട്ട് (488 സെ.മീ), 200 മീറ്റർ ഓട്ടം (36 സെക്കൻഡ്), ബോൾ ത്രോ (14 മീറ്റർ), ഷട്ടിൽ റേസ് (26 സെക്കൻഡ്), സ്കിപ്പിങ് (ഒരു മിനുട്ടിൽ 80 തവണ) എന്നിവ ഉൾപ്പെടുന്നു.താൽപര്യമുള്ള ഉദ്യോഗാർത്ഥികൾ കേരള പിഎസ്‌സിയുടെ ഔദ്യോഗിക വെബ്സൈറ്റ് https://thulasi.psc.kerala.gov.in/thulasi/ സന്ദർശിച്ച് അപേക്ഷ സമർപ്പിക്കണം. ആദ്യമായി രജിസ്‌ട്രേഷൻ ചെയ്യുന്നവർ “ഒറ്റത്തവണ രജിസ്‌ട്രേഷൻ” പൂർത്തിയാക്കേണ്ടതുണ്ട്. ഇതിനകം രജിസ്‌ട്രേഷൻ ചെയ്തവർക്ക് പ്രൊഫൈൽ വഴി നേരിട്ട് അപേക്ഷിക്കാം. അപേക്ഷയ്ക്കായി പ്രത്യേക ഫീസ് നൽകേണ്ടതില്ല.