തദ്ദേശ തിരഞ്ഞെടുപ്പ് ഫലങ്ങൾ: വയനാട്ടിൽ യുഡിഎഫ് ശക്തമായ മുന്നേറ്റം

വയനാട് ജില്ലയിൽ നടന്ന തദ്ദേശ സ്വയംഭരണ തിരഞ്ഞെടുപ്പിൽ ഇതുവരെ ലഭ്യമായ ഫലങ്ങളും ലീഡ് നിലയും അനുസരിച്ച് യുഡിഎഫിന് വൻ മുന്നേറ്റം. വയനാട് ജില്ലാ പഞ്ചായത്തിലെ ആകെ 17 ഡിവിഷനുകളിൽ 15 ഡിവിഷനുകളിൽ യുഡിഎഫ് ലീഡ് ചെയ്യുകയാണ്.

ജില്ലയിലെ നാലു ബ്ലോക്ക് പഞ്ചായത്തുകളിലും യുഡിഎഫ് ലീഡ് നിലനിൽക്കുന്നു. മൂന്ന് നഗരസഭകളിൽ രണ്ട് നഗരസഭകൾ യുഡിഎഫ് നേടി.
മാനന്തവാടി നഗരസഭ യുഡിഎഫ് നിലനിർത്തിയതോടൊപ്പം സുൽത്താൻബത്തേരി നഗരസഭയും യുഡിഎഫ് പിടിച്ചെടുത്തു. അതേസമയം, കൽപറ്റ നഗരസഭ എൽഡിഎഫ് തിരിച്ചുപിടിച്ചു.

ഗ്രാമ പഞ്ചായത്തുകളിലും യുഡിഎഫിന് വ്യക്തമായ മുന്നേറ്റമാണ് റിപ്പോർട്ട് ചെയ്യുന്നത്. കൽപറ്റ നിയമസഭാ മണ്ഡലത്തിൽ, മുൻപ് എൽഡിഎഫ് ഭരിച്ചിരുന്ന വൈത്തിരി, പൊഴുതന, വെങ്ങപ്പള്ളി പഞ്ചായത്തുകൾ യുഡിഎഫ് സ്വന്തമാക്കിയപ്പോൾ,
മുൻപ് യുഡിഎഫ് ഭരിച്ചിരുന്ന മുപ്പെനാട്, മുട്ടിൽ പഞ്ചായത്തുകൾ എൽഡിഎഫ് നേടി.

വോട്ടെണ്ണൽ പുരോഗമിക്കുന്നതിനാൽ ഫലങ്ങളിൽ മാറ്റങ്ങൾ ഉണ്ടാകാൻ സാധ്യതയുണ്ടെന്നാണ് വിലയിരുത്തൽ.

നാലംഗ കുടുംബത്തെ ക്രൂരമായി വെട്ടിക്കൊന്ന കേസ്; വയനാട്ടുകാരന് വധശിക്ഷ

തലപ്പുഴ: അത്തിമൂല കോളനിയിലെ ഗിരീഷ് (38) നാലംഗ കുടുംബത്തെ ക്രൂരമായി വെട്ടിക്കൊന്ന കേസിൽ വധശിക്ഷയ്ക്ക് വിധിക്കപ്പെട്ടു. ഈ ഞെട്ടിക്കുന്ന സംഭവത്തിൽ ഗിരീഷ് തന്റെ ഭാര്യ നാഗി (30), മകൾ കാവേരി (5), കൂടാതെ നാഗിയുടെ മാതാപിതാക്കളായ കരിയ (75)യും ഗൗരി (70)യെയും 2024 മാർച്ച് 27 ന് വെട്ടിക്കൊന്നുകയായിരുന്നു.ബെഗുരു ഗ്രാമത്തിലെ ആദിവാസി കോളനിയിൽ താമസിച്ചിരുന്ന ഇവരുടെ കുടുംബജീവിതത്തിൽ, ഭാര്യയ്ക്ക് വിവാഹേതരബന്ധമുണ്ടെന്ന ഗിരീഷിന്റെ സംശയവും മദ്യപാന ശീലവും കാരണം പതിവായി വഴക്കുകൾ ഉണ്ടാകാറുണ്ടായിരുന്നു. സംഭവദിവസം മദ്യത്തിനായി പണം ആവശ്യപ്പെട്ടപ്പോൾ നാഗി നൽകാതിരുന്നതിനെ തുടർന്ന് അവളെ മർദിക്കുകയും വെട്ടിക്കൊലപ്പെടുത്തുകയും ചെയ്ത ഗിരീഷ്, ഉടനെതിരെ എത്തിയ മകളും നാഗിയുടെ മാതാപിതാക്കളും തടയാൻ ശ്രമിച്ചതോടെ അവരെയും ക്രൂരമായി കൊലപ്പെടുത്തി. കൊലപാതകത്തിന് ശേഷം ഗിരീഷ് കണ്ണൂരിലേക്ക് ഒളിച്ചോടി, എന്നാൽ രണ്ടുദിവസത്തിനുശേഷം ഇരിട്ടിയിൽ പൊലീസ് ഇയാളെ അറസ്റ്റ് ചെയ്തു. പൊന്നംപേട്ട പൊലീസ് നടത്തിയ അന്വേഷണവും സമർപ്പിച്ച കുറ്റപത്രവും പരിഗണിച്ചാണ് വിരാജ്പേട്ട ജില്ലാ സെഷൻസ് കോടതി ജഡ്‌ജി എസ്. നടരാജ വധശിക്ഷ വിധിച്ചത്.

കേരളത്തിൽ ക്രിസ്മസ് അവധി പ്രഖ്യാപിച്ചു; ഈ വർഷം 12 ദിവസത്തെ നീണ്ട അവധി

തിരുവനന്തപുരം:സംസ്ഥാന സർക്കാർ ഈ അധ്യയന വർഷത്തെ ക്രിസ്മസ് അവധി പ്രഖ്യാപിച്ചു. ഔദ്യോഗിക ഉത്തരവനുസരിച്ച് ഡിസംബർ 24 മുതൽ ജനുവരി 4 വരെ ക്രിസ്മസ് അവധി തുടരുന്നതായിരിക്കും. ആകെ 12 ദിവസത്തെ നീണ്ട അവധിയാണ് വിദ്യാർത്ഥികൾക്കും അധ്യാപകർക്കും ലഭിക്കുന്നത്. ക്രിസ്മസ് ആഘോഷങ്ങൾക്ക് ഒരുക്കങ്ങൾ തുടങ്ങിയിരിക്കുന്നത് ഇതോടെ കൂടുതൽ സജീവമാവും.അവധി സംബന്ധിച്ച സർക്കാർ ഉത്തരവ് ഇതിനോടകം പ്രസിദ്ധീകരിച്ചുകഴിഞ്ഞു.

നടിയെ ആക്രമിച്ച കേസ്: ഗൂഢാലോചന വെളിപ്പെടുത്താൻ അന്വേഷണം ആവശ്യപ്പെട്ട് ദിലീപ് നിയമനടപടിയിലേക്ക്

നടിയെ ആക്രമിച്ച കേസിൽ വിചാരണക്കോടതി കുറ്റവിമുക്തനാക്കിയതിനെ തുടർന്ന്, നിയമനടപടികൾക്ക് ഒരുങ്ങുന്നതായി നടൻ ദിലീപ് വ്യക്തമാക്കി. തനിക്കെതിരായ ഗൂഢാലോചനയെക്കുറിച്ച്‌ സമഗ്രമായ അന്വേഷണം ആവശ്യപ്പെടാനാണ് തീരുമാനം. മുഖ്യമന്ത്രി ഉൾപ്പെടെ നിരവധി ഉന്നതരെ അന്വേഷണ സംഘം തെറ്റിദ്ധരിപ്പിച്ചുവെന്നാണു ദിലീപിന്റെ ആരോപണം. വ്യക്തിപരമായ നേട്ടങ്ങൾക്കായി തന്നെ “ബലിയാടാക്കിയതാണെന്ന്” അദ്ദേഹം ആരോപിച്ചു.വിധിയുടെ പകർപ്പ് ലഭിച്ച ശേഷം തുടർ നടപടികൾ ആരംഭിക്കുമെന്ന് ദിലീപ് വ്യക്തമാക്കി. നടിയെ ആക്രമിച്ച കേസിൽ തനിക്കെതിരായ ഗൂഢാലോചനയ്ക്ക് തുടക്കമിട്ടത് നടി മഞ്ജു വാര്യരാണെന്ന അവകാശവാദവും ദിലീപ് ഉന്നയിച്ചു. അമ്മയുടെ ദർബാർ ഹാൾ ഗ്രൗണ്ടിലെ പ്രസംഗമാണ് തനിക്കെതിരായ ഗൂഢാലോചനയുടെ പ്രാരംഭ സൂചനയെന്നുമാണ് അദ്ദേഹത്തിന്റെ അഭിപ്രായം.അതേസമയം, മഞ്ജു വാര്യർ ഇതുസംബന്ധിച്ച് പ്രതികരിച്ചിട്ടില്ല. ജയിലിലെ പ്രതികളെ ഉപയോഗിച്ച്‌ കള്ളക്കഥ ഒരുക്കിയാണ് പൊലീസ് വിഭാഗത്തിലെ ചിലർ യഥാർത്ഥ ഗൂഢാലോചന നടത്തിയതെന്നും അതിലൂടെ തന്റെ ജീവിതവും കരിയറും തകർത്തുവെന്നുമാണ് ദിലീപ് ആരോപിക്കുന്നത്. ഈ നിലപാടിനെ പിന്തുണച്ചാണ് ദിലീപിന്റെ അഭിഭാഷകൻ ബി. രാമൻപിള്ളയും ഉന്നത ഉദ്യോഗസ്ഥർ ഗൂഢാലോചന നടത്തിയതെന്ന് പറഞ്ഞത്.സർക്കാർ വിചാരണക്കോടതിയുടെ വിധിക്കെതിരെ ഹൈക്കോടതിയിൽ അപ്പീൽ നൽകുമെന്ന് വ്യക്തമാക്കി. അതിജീവിതയ്ക്കൊപ്പമാണ് സർക്കാരിന്റെ നിലപാടെന്ന് മന്ത്രിമാരും വ്യക്തമാക്കി. ഗൂഢാലോചന തെളിയിപ്പിക്കാൻ പൊലീസും പ്രോസിക്യൂഷനും പരാജയപ്പെട്ടുവെന്നുമാണ് കോൺഗ്രസിന്റെ വിമർശനം. പിടി തോമസിന്റെ ഇടപെടലില്ലായിരുന്നെങ്കിൽ കേസ് നിലനിൽക്കാനുള്ള സാധ്യതയില്ലായിരുന്നുവെന്നും പ്രതിപക്ഷ നേതാവ് വി.ഡി. സതീശൻ അഭിപ്രായപ്പെട്ടു.അതിജീവിതയ്ക്കു സമ്പൂർണ നീതി ലഭിച്ചില്ലെന്ന നിലപാടാണ് ഉമ തോമസ് എം.എൽ.എയും ഉന്നയിച്ചത്. മഞ്ജു വാര്യർക്കെതിരെ ദിലീപ് നടത്തിയ പരാമർശങ്ങൾ “വളച്ചൊടിക്കൽ” മാത്രമാണെന്നും മുമ്പ് ഉന്നയിക്കാത്ത വാദങ്ങളാണ് ഇപ്പോൾ മുന്നോട്ട് വയ്ക്കുന്നതെന്നും അവർ പ്രതികരിച്ചു. വിഷയം വഴിതിരിച്ചുവിടാനുള്ള നീക്കമാണിതെന്നുമാണ് ഉമ തോമസ് ആരോപിച്ചത്.അപ്പീൽ നൽകുന്നതിനായി സർക്കാരിന് കത്ത് നൽകുന്നതിനെക്കുറിച്ചുള്ള ആലോചന തുടരുകയാണെന്നും വിധി സൂക്ഷ്മമായി പഠിച്ചശേഷം അന്തിമ തീരുമാനം എടുക്കുമെന്നും ഉമ തോമസ് വ്യക്തമാക്കി.