കേന്ദ്ര ധനമന്ത്രി നിർമ്മലാ സീതാരാമൻ രാജ്യസഭയിൽ നടത്തിയ പ്രസ്താവന കേരളത്തെക്കുറിച്ച് തെറ്റിദ്ധാരണ പരത്തുന്നതാണെന്ന് പൊതുവിദ്യാഭ്യാസവും തൊഴിലും വകുപ്പ് മന്ത്രി വി. ശിവൻകുട്ടി. ഒറ്റപ്പെട്ട സംഭവങ്ങൾ പാർവതീകരിച്ച് സംസ്ഥാനത്തെ അപമാനിക്കാൻ ധനമന്ത്രി ശ്രമിച്ചതായും അദ്ദേഹം കുറ്റപ്പെടുത്തി. കേരളത്തിൽ നോക്കുകൂലി നിരോധിച്ചിട്ടുള്ളതും, അത്തരം പ്രവണതകൾക്കെതിരെ സർക്കാർ ശക്തമായ നടപടികൾ സ്വീകരിച്ചിട്ടുണ്ടെന്നും മന്ത്രി വ്യക്തമാക്കി.
വയനാട്ടിലെ വാർത്തകൾ തൽസമയം അറിയാൻ വാട്സ്ആപ്പ് ഗ്രൂപ്പിൽ ജോയിൻ ചെയ്യുകhttps://chat.whatsapp.com/CyrYFy1m4b928e7srkZyve
കേരളം തൊഴിൽ മേഖലയിൽ രാജ്യത്തിന് മാതൃക
തൊഴിൽ മേഖലയിൽ കേരളം രാജ്യത്തിന് വഴികാട്ടിയാണെന്ന് മന്ത്രി ചൂണ്ടിക്കാട്ടി. തൊഴിൽ നിയമങ്ങൾ മാറ്റിമറിക്കപ്പെടുന്ന സാഹചര്യത്തിലും കേരളം മികച്ച തൊഴിലാളി-തൊഴിലുടമാ ബന്ധം ഉറപ്പാക്കുകയും സൗഹൃദപരമായ തൊഴിൽ സംസ്‌കാരം മുന്നോട്ട് കൊണ്ടുപോകുകയും ചെയ്യുന്നു. കേരളം ഇന്ത്യയിലെ ആദ്യ തൊഴിൽ നയം ആവിഷ്‌കരിച്ച സംസ്ഥാനമാണ്. തൊഴിലാളികളുടെ ക്ഷേമനിർമ്മാണ പ്രവർത്തനങ്ങൾക്കും സാമൂഹിക സുരക്ഷയ്ക്കും സർക്കാർ വലിയ പ്രാധാന്യം നൽകുന്നുണ്ടെന്ന് മന്ത്രി പറഞ്ഞു.
കേന്ദ്ര കണക്കുകൾ തന്നെ കേരളത്തിന്റെ മുന്നേറ്റം തെളിയിക്കുന്നു
റിസർവ് ബാങ്കിന്റെയും കേന്ദ്ര സർക്കാരിന്റെയും കണക്കുകൾ പ്രകാരം, രാജ്യത്ത് ഏറ്റവും കൂടുതൽ കൂലി ലഭിക്കുന്ന സംസ്ഥാനമാണ് കേരളം. വിവിധ തൊഴിൽ മേഖലകളിലെ ദിവസ വേതനം ദേശീയ ശരാശരിയേക്കാൾ ഇരട്ടിയിലധികമാണ്. 85 തൊഴിൽ മേഖലകളിൽ മിനിമം വേതനം നിർണയിച്ചതിനൊപ്പം, അസംഘടിത തൊഴിലാളികളടക്കമുള്ള 70 ലക്ഷത്തിലധികം തൊഴിലാളികൾക്ക് ക്ഷേമനിധി ബോർഡുകളിലൂടെയും പെൻഷൻ ഉൾപ്പടെയുള്ള ആനുകൂല്യങ്ങളിലൂടെയും സർക്കാർ സാമ്പത്തിക സഹായം നൽകുന്നുണ്ട്.
ആധുനിക തൊഴിൽ സൗകര്യങ്ങൾ ഉറപ്പാക്കുന്നു
കേരളത്തിൽ തൊഴിൽ ചെയ്യുന്ന സ്ത്രീകൾക്ക് മെറ്റേണിറ്റി ബെനഫിറ്റ്, സുരക്ഷിതമായ രാത്രി ജോലി, ടെക്സ്റ്റൈൽ മേഖലയിലടക്കമുള്ള ആധുനിക തൊഴിൽ സൗകര്യങ്ങൾ ഉറപ്പാക്കുകയും അതിഥി തൊഴിലാളികൾക്ക് ചികിത്സാസഹായം, താമസസൗകര്യങ്ങൾ എന്നിവ സർക്കാർ ഉറപ്പ് നൽകുകയും ചെയ്യുന്നു. തൊഴിൽ രംഗത്തെ പ്രശ്നങ്ങൾ ഉടൻ പരിഹരിക്കുന്നതിൽ സംസ്ഥാന സർക്കാർ മുൻപന്തിയിലാണെന്നും മന്ത്രി കൂട്ടിച്ചേർത്തു.
ധനമന്ത്രിയുടെ പരാമർശം കേരള വിരുദ്ധവും കമ്മ്യൂണിസ്റ്റ് വിരോധവുമായി ബന്ധപ്പെട്ടു:
കേന്ദ്ര ധനമന്ത്രിയുടെ പ്രസ്താവന കേരളത്തെ തെറ്റിദ്ധരിപ്പിക്കാൻ ഉദ്ദേശിച്ചുള്ളതാണെന്ന് മന്ത്രി ആരോപിച്ചു. കേരളത്തെ വ്യവസായ സൗഹൃദ സംസ്ഥാനമെന്ന നിലയിൽ വ്യവസായ പ്രമുഖർ പോലും അംഗീകരിച്ചിട്ടുണ്ടെന്നും, തൊഴിലാളി വിരുദ്ധ ലേബർ കോഡുകൾ അടിച്ചേൽപ്പിക്കാൻ ശ്രമിക്കുന്ന കേന്ദ്ര സർക്കാരിന്റെ ഭാഗമാണ് നിർമ്മലാ സീതാരാമന്റെ നിലപാടെന്നും മന്ത്രി വി. ശിവൻകുട്ടി പറഞ്ഞു.
കേരളത്തിലെ യഥാർത്ഥ തൊഴിൽ സാഹചര്യം മനസ്സിലാക്കാൻ ധനമന്ത്രിയെ ക്ഷണിക്കുന്നു
കേരളം സംബന്ധിച്ച യാഥാർഥ്യങ്ങൾ നേരിട്ട് മനസ്സിലാക്കുന്നതിനായി ധനമന്ത്രിയെ സംസ്ഥാനത്തേക്ക് ക്ഷണിക്കുന്നതായും വി. ശിവൻകുട്ടി വ്യക്തമാക്കി. തൊഴിൽ രംഗത്ത് കേരളം കൈക്കൊണ്ട മുന്നേറ്റങ്ങൾ അന്ധമായി നിരാകരിക്കാനാകില്ലെന്നും, കേരളത്തിലെ തൊഴിൽ അന്തരീക്ഷം രാജ്യത്ത് തന്നെ മികച്ചതാണെന്നും മന്ത്രി കൂട്ടിച്ചേർത്തു.